Inflıatsııaǵa qandaı taýarlardyń qymbattaýy áser etedi

ASTANA. QazAqparat -  Inflıatsııanyń edáýir ulǵaıýyna kómir, AI-92 markaly benzın, dızel otyny baǵasynyń qymbattaýy áser etti. Bul týraly búgin Úkimettiń selektorlyq rejimdegi otyrysynda  QR Ulttyq ekonomıka birinshi vıtse-mınıstri Rýslan Dálenov aıtty, dep habarlaıdy QazAqparat tilshisi.

«Aǵymdaǵy jyldyń basynan beri ınflıatsııa deńgeıi 5-7 paıyz aralyǵy sheginde saqtalýda. Aǵymdaǵy jylǵy qyrkúıekte ınflıatsııa 0,4 paıyzdy qurady, jyl basynan beri 3,3 paıyzǵa ósti. Jyldyq ınflıatsııa 2018 jylǵy qyrkúıekte 2017 jylǵy qyrkúıekke qaraǵanda 6,1 paıyzǵa artty. Jalpy turaqty jaǵdaıǵa qaramastan keıbir taýarlar boıynsha baǵanyń edáýir óskeni baıqalady», - dedi ol.

Vıtse-mınıstrdiń aıtýynsha, jyldyq kórsetkishte eń joǵary baǵa ósimi dızel otynyna - 38,2,   qyzylshaǵa - 18,3,   qala mańy jol júrý aqysyna - 18,1,   qyryqqabatqa - 16,7,    tas kómirge -15,2 paıyzǵa qymbattaǵan. Bul rette, ınflıatsııanyń edáýir ulǵaıýyna tas kómir, Aı-92 markaly benzın, dızel otyny yqpal etken.

«Jalpy, azyq-túlik taýarlary boıynsha ósý 2017 jylǵy jeltoqsanǵa qaraǵanda 2,3 paıyz qurady. Bul azyq-túlik emes taýarlary boıynsha ósý qarqynynan tómen. Olardyń baǵasy 4,3 paıyzǵa ósti. Aqyly kórsetiletin qyzmetterde baǵa men tarıfter qalypty qarqynmen ósti. Ósim - 3,4 paıyz», - dedi Rýslan Dálenov.