Inflıatsııa ósken saıyn halyqtyń naqty tabysy qunsyzdanyp jatyr - Prezıdent

ASTANA. QazAqparat – Inflıatsııa ósken saıyn halyqtyń naqty tabysy qunsyzdanyp jatyr. Bul týraly elimizdiń áleýmettik-ekonomıkalyq damýy jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Inflıatsııa ósken saıyn halyqtyń naqty tabysy qunsyzdanyp jatyr. Jurttyń tabysyn áleýmettik salanyń shyǵysy esebinen arttyrýdyń da shegi bar. Biz osy shekke jetken sııaqtymyz. Buǵan qosa, tutyný nesıeleriniń kólemi artyp barady. Bul áreket – ınflıatsııa kezinde jan baǵýdyń amaly. Biraq mundaı ahýaldyń áleýmettik jáne saıası saldary óte aýyr bolýy múmkin. Tipti, bankterdiń ózine qaýip tóndirýi yqtımal», - dedi Memleket basshysy.

Prezıdent nesıeni eń aldymen, paıda ákeletin bızneske, ıaǵnı tıimdi jobalarǵa berý kerektigin basa aıtty.

«Sonda jalaqysy joǵary jumys oryndary paıda bolady. Jurttyń kásipkerlikpen aınalysýǵa yntasy artady. Bir sózben aıtsaq, azamattardyń tabysyn kóbeıtýge múmkindik týady», - dedi Qasym-Jomart Toqaev.