Infektsıonıst dáriger qysqy merekelerde karantın talaptaryn ustanýǵa shaqyrdy

NUR-SULTAN. QazAqparat –Densaýlyq saqtaý salasynyń mamandary koronavırýspen syrqattanýdyń aldyn alýǵa qatysty eskertý jasap jatyr. Qazirgi kezde álem elderinde aýrýdyń taralýy jalǵasýda. Bul óz kezeginde indetke shaldyǵý deńgeıi artyp kele jatqanyn baıqatyp otyr. Osy oraıda Astana medıtsına ýnıversıteti Balalar juqpaly aýrýlary kafedrasynyń meńgerýshisi Dınagúl Baesheva qazaqstandyqtardy saqtyq sharalaryn oryndaýǵa shaqyrdy, dep habarlaıdy QazAqparat tilshisi.

«Іndettiń taralýy máselesinde adamdar bul protsesti ózi basqarady. Koronavırýstyń joq bolýy da, tyń qarqynmen údep ketýi de múmkin. Bir-birimizge vırýsty qanshalyqty taratatynymyzǵa baılanysty. Máselen, qatań sharalar qabyldanǵan, úıden shyǵarmaǵan kezeńdi alyp qaraıyq. Sol kezde vırýstyń adamnan adamǵa taraıtyny kóp aıtyldy.Temperatýra jyly ma, sýyq pa, aıaz ba, aptap ystyq pa – vırýsqa báribir. Sebebi indet – adam arqyly taraıdy», - dedi Dınagúl Baesheva.

Osy oraıda maman mamyr aıynda TJ rejımi alynyp tastalyp, karantın engizilgenin eske saldy. Bul kezeńde adamdar jaǵdaıdy áli tolyq túsinbedi. Bálkim, bizdiń elde mundaı indettiń buryn bolmaǵany da, mundaı sharalardyń eshqashan qabyldanbaǵany da sebep bolǵan shyǵar.

«Birqatar elde dárigerler men epıdemıologtardyń keńesin buljytpaı orynǵanyn kórdik. Bizde halyqtyń biraz bóligi sol kezde vırýstyń joqtyǵyn aıtysyp, muny ádeıi jasalyp jatqan shekteýler retinde qabyldady. Negizsiz ýáj aıtyp, sonyń saldarynan kóbisinde kúdik boldy. Maýsymda karantın men TJ rejımi alynyp tastalyp edi, bári kóshege shyǵyp, qoǵamdyq oryndardy aralap ketti», - deıdi ınfektsıonıst.

Onyń aıtýynsha, myńdaǵan adam bazarǵa shyǵyp, qydyryp ketken. Adamdar saqtyq sharalaryna mán bermeı, aqparatty qabyldamady. Aqyry bir aptada ǵana naýqastar kúrt kóbeıip, syrqatty aýyr kóteretinder de ósip ketti. Munyń bári – ınkýbatsııalyq kezeńniń aıaqtalýynan boldy. Eshteńege senbeı, bir-birimen baılanysta, qarym-qatynasta bolǵandar kóbeıdi.

Bul turǵyda Dınagúl Baesheva el halqyn osy qatelikterdi qaıtalamaýǵa shaqyrdy. Alda qysqy merekelik kúnder kóp bolǵandyqtan, osy demalys kezeńinde árbir qala men eldi meken turǵyndary saqtyq sharalaryna erekshe mán berýi kerek.

«Bıyldyń basynan beri adamdar koronavırýsqa qarsy kúresti úırenip alatyndaı boldy. Іndet qaýpin sezine júrýimiz kerek. Sondyqtan bizdiń mindet – jaǵdaıǵa qaraı beıimdelý. Mamandar belgilep bergen sharalardy ustanǵan abzal. Vırýs jyl mezgiline qaramaı tarap jatyr. Ol eń aldymen óziniń kóbeıý jolyn izdeıdi. Mindeti - ókpege jetse boldy. Sol sebepti biz sozylmaly aýrýlary bar adamdarǵa ekpin qoıyp otyrmyz. Koronavırýs juqtyrǵan adamnyń burynnan bergi sozylmaly aýrýy qozyp ketýi yqtımal», - dedi Dınagúl Baesheva.

Sonymen qatar ol koronavırýsty anyqtaý testi oń nátıje kórsetken kezde úreıge boı aldyrýdyń qajeti joq ekenin atap ótti. Aýrýǵa shaldyqqandardyń basym bóliginde indettiń jeńil ári sımptomsyz formasy bolady.

«Adamdardyń kópshiligi PTR-test oń nátıje kórsetken jaǵdaıda úreıge boı aldyryp jatady. Munan qorqýdyń qajeti joq. Sabyrlyq saqtaý kerek. Qazirgi ýaqytta úreıge boı aldyryp, dúrbeleń týdyrýǵa bolmaıdy», - dedi maman.