Indýstrııalyq-ınnovatsııalyq damý baǵdarlamasy QHR tarapynan qoldaý tabady - N.Nazarbaev

ASTANA. QazAqparat - Qazaqstan Prezıdenti Nursultan Nazarbaev Qytaı Halyq Respýblıkasyna memlekettik saparynyń qorytyndysy boıynsha baspasóz brıfıngin ótkizdi, dep habarlady Aqordanyń baspasóz qyzmeti.

Qazaqstan Prezıdenti túrli salada ýaǵdalastyqtarǵa qol jetkizilgen bul sapardyń mańyzdylyǵyn atap ótti. Ol eki memleket basshysynyń qatysýymen óńdeýshi ónerkásip salasynda da birlesken óndirister ashýdy qarastyrǵan birqatar qujattarǵa qol qoıylǵanyn aıtty.

- Qytaı óz ınvestıtsııasy esebinen Tarazda glıfosat óndiretin jobany júzege asyrýymyzǵa kómektesedi. Almaty oblysynda munaı-gaz qubyrlaryn shyǵaratyn zaýyt qurylysy josparlanyp otyr. Sondaı-aq Qostanaı oblysyndaǵy Torǵaı kómir kenishi mańynda jylý elektr stansasyn salý máselesi muqııat pysyqtaldy. Qaraǵandyda kómir óńdeý, odan gaz, benzın, dızeldi otyn jáne karbamıd óndirý jónindegi ınnovatsııalyq kompanııa jumys isteıtin bolady. Aqtóbe jáne Mańǵystaý oblystarynda josparlanyp otyrǵan azot tyńaıtqyshtary óndirisi de ǵylymdy jáne mol kapıtaldy qajetsinedi. Qytaı Shymkent munaı óńdeý zaýytyn qaıta qurýǵa qatysatyn bolady. Budan bólek, biz Qazaqstannan jetkiziletin munaı men gaz kólemin ulǵaıtý jumysyn júrgizemiz, - dedi Nursultan Nazarbaev.

Sondaı-aq, Memleket basshysy Tynyq muhıtyndaǵy Lıanıýngan portynda Qazaqstannyń termınalyn ashýdyń mańyzy joǵary ekenin atap aıtty.

- Ol konteınerlerdi Qytaı men Qazaqstan arqyly Eýropaǵa jetkizýge múmkindik beredi. Termınaldyń bastapqy qýaty jylyna 3 mln tonna bolyp, bolashaqta eki ese ulǵaıtylady. Osylaısha, elimizdiń tranzıttik áleýeti tolyq paıdalanylatyn bolady, - dedi Qazaqstan Prezıdenti.

Nursultan Nazarbaev Qazaqstanǵa keletin qytaı ınvestıtsııalarynyń jalpy kólemi 10 mıllıard dollardan asatynyn atap ótti.

- Indýstrııalyq-ınnovatsııalyq damý baǵdarlamasy QHR tarapynan qoldaý tabady. Jańa jobalardyń barlyǵy Qazaqstan ekonomıkasyn nyǵaıtýǵa, halqymyzdyń ál-aýqatyn jaqsartýǵa qyzmet etetin bolady, - dedi Memleket basshysy.