Indýstrııalyq aımaqtardyń jumysyna revızııa júrgizý usynyldy

ASTANA. QazAqparat – Senattyń Ekonomıkalyq saıasat, ınnovatsııalyq damý jáne kásipkerlik komıtetiniń hatshysy Serik Shaıdarov óńirlerdi damytý jónindegi Parlamenttik tyńdaýda «Arnaıy ekonomıkalyq aımaqtar ınvestıtsııa tartady» degen teorııanyń rastyǵyna kúmán keltirdi, dep habarlaıdy QazAqparat tilshisi.

«Arnaıy ekonomıkalyq jáne ındýstrııalyq aımaqtardy qaıta formattaý máselesin qarastyrǵan jón. Arnaıy ekonomıkalyq aımaqtar qurýdaǵy maqsattardyń biri ınvestıtsııa tartý bolatyn. Alaıda, búginde arnaıy ekonomıkalyq aımaqtar negizgi kapıtalǵa ınvestıtsııalardyń jalpy kóleminiń 30%-dan astamyn quraıtyn eldiń 9 óńirinde (Aqmola, Aqtóbe, Almaty, Shyǵys Qazaqstan oblysy, Batys Qazaqstan oblysy, Qostanaı, Qyzylorda, Abaı jáne Ulytaý) jumys istep turǵan joq.

Tipti 2022 jylǵy ınvestıtsııalar kólemi boıynsha óńirlerdiń úzdik bestigine kiretin Aqtóbe oblysynda da arnaıy ekonomıkalyq aımaq joq.

Al ınvestıtsııa tartý kólemi Aqtóbe oblysyna qaraǵanda 3,5 ese tómen Jetisý oblysynda eki arnaıy ekonomıkalyq aımaq jumys isteıdi», - dedi Senat depýtaty.

Onyń paıymynsha, ındýstrııalyq aımaqtardyń jaǵdaıy da osyǵan uqsas.

«Búginde barlyq ındýstrııalyq aımaqtardyń 80%-y Qazaqstannyń ońtústik bóliginde shoǵyrlanǵan (Almaty, Jambyl, Jetisý - 1, Almaty - 3, Shymkent-4, Qyzylorda-6, Túrkistan-9). Tek Túrkistan oblysynda osyndaı 9 aımaq jumys isteıdi.

Al eldiń soltústik (Aqmola, Qostanaı, Pavlodar jáne Soltústik Qazaqstan oblysy) jáne batys bólikterinde (Aqtóbe, Atyraý, Batys Qazaqstan oblysy, Mańǵystaý), ıaǵnı 8 oblystyń ekeýinde ǵana (Qostanaı jáne Aqtóbe) ındýstrııalyq aımaq bar.

Óńirlerdiń mamandanýyn eskere otyryp, arnaıy ekonomıkalyq aımaq jumysynyń tıimdiligin arttyrý jóninde sharalar qabyldaý qajet.

Budan basqa, qoldanystaǵy ındýstrııalyq aımaqtarǵa, onyń ishinde olardyń tıimdiligi men perspektıvaly jobalardyń bolýyna revızııa júrgizýdi usynamyz», - dedi Serik Shaıdarov.