Indýstrııalandyrýdyń 2-shi besjyldyǵyn ózektendirý boıynsha jarlyq jobasy 2016 jyldyń 1 naýryzynda Úkimet qaraýyna engiziledi
«Memleket basshysynyń tapsyrmasyna sáıkes jahandyq ekonomıkalyq, tehnologııalyq trendter eskerilgen ekinshi besjyldyqty (Indýstrııalandyrýdyń ekinshi besjyldyǵy) ózektendirý boıynsha jarlyq jobasy 2016 jyldyń 1 naýryzynda Úkimet qaraýyna engiziledi», - dedi mınıstr.
Onyń sózine qaraǵanda, mınıstrlik jahandyq ekonomıkalyq, tehnologııalyq trendterge saraptama júrgizip úlgergen. «Osyny, sonymen birge aǵymdaǵy ekonomıkalyq ahýaldy, 2016 jylǵa arnalǵan boljamdardy eskere otyryp, 2015 jyldan 2019 jylǵa deıin baǵdarlamaǵa túzetý engizý usynylady. Ózektendirý aıasynda óńdeý ónerkásibine basymdyq kúsheıtile túsedi», - dedi ol.
Aldaǵy ýaqytta ónimdi qyzmetterdi damytýǵa, eńbek ónimdiligin kóterýge basymdyq beriletinin aıta kele Á.Isekeshev: «Baǵdarlama jobasy qazirgi ýaqytta barlyq memlekettik organdarmen, ákimdiktermen, ulttyq holdıngtermen jáne Ulttyq kásipkerler palatasymen ázirlenýde. Baǵdarlama jobasy taıaý aralyqta Ónerkásiptik damý komıssııasynyń qaraýyna engiziledi», - dedi.