Indýstrııalandyrý: Jeti jylda 6,6 trln teńgeniń jobasy iske qosyldy

ASTANA. QazAqparat - Qazaqstanda 2010-2017 jyldar aralyǵynda Indýstrııalandyrý baǵdarlamasy boıynsha 6,6 trln teńgeniń jobalary iske asyryldy. Bul týraly QR Investıtsııalar jáne damý mınıstri Jeńis Qasymbek baspasóz máslıhatynda málim etti, dep habarlaıdy QazAqparat tilshisi.

Qazaqstanda ındýstrııalandyrý baǵdarlamasy 2010 jyly bastalǵan bolatyn. Qazir onyń ІІ besjyldyǵy iske asyrylýda.

Atap ótilgendeı, Indýstrııalandyrý baǵdarlamasy aıasynda tartylǵan tikeleı sheteldik ınvestıtsııa qurylymynda óńdeý ónerkásibiniń úlesi shamamen 3 esege ósti.

«Bıylǵy birinshi jartyjyldyqta óńdeý sektory ótken jyldyń sáıkes kezeńimen salystyrǵanda 5,2% ósti. Indýstrııalyq damýdyń negizgi kórsetkishteri boıynsha da oń dınamıka baıqalyp otyr. Bıylǵy jyldyń qańtar-aqpan aılarynda bul kórsetkish 2017 jyldyń sáıkes kezeńimen salystyrǵanda 22,1% artyp, 2,5 mlrd AQSh dollaryna jetti. 2018 jyldyń qańtar-maýsymynda óńdeý ónerkásibine salynǵan ınvestıtsııa kólemi 18,2% ósip, 532,8 mlrd teńgeni qurady», - dep atap ótti Jeńis Qasymbek.

2010-2017 jyldar aralyǵynda baǵdarlama boıynsha barlyǵy 6,6 trln teńge bolatyn 1148 joba iske qosyldy. 107 myń turaqty jumys orny ashyldy.

Bıyl jalpy somasy 850 mlrd teńgege 123 jobany júzege asyrý josparlanyp otyr. Jańadan 14 myńnan astam jumys orny qurylatyny kútilýde.

Vedomstvo basshysynyń aqparaty boıynsha, bıylǵy jyldyń 1-toqsanynda tikeleı sheteldik ınvestıtsııanyń jalpy aǵyny 6,7 mlrd AQSh dollaryn qurap, 24,4% ósti. Negizgi kapıtalǵa salynǵan ınvestıtsııalardyń jalpy kólemi 2018 jyldyń alty aıynda 4,5 trln teńgeni qurady. Bul ótken jyldyń sáıkes kezeńimen salystyrǵanda 25,8%  artyq.

«Biz 59 mıllıard dollardan asatyn 658 ınvestıtsııalyq jobanyń negizgi tizbesin qurdyq, ol 2020 jylǵa deıin júzege asyrylady», - dedi mınıstr.