Indýstrııalandyrý kartasy: Bıyl 17 myń jumys orny ashylady

NUR-SULTAN. QazAqparat - Indýstrııalandyrý kartasy aıasynda bıyl elimizde 17 myń jańa jumys orny ashylady. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat tilshisi.

«Bıyl Indýstrııalandyrý kartasy aıasynda taý-ken metallýrgııa kesheni, qurylys ındýstrııasy, hımııa ónerkásibi, mashına jasaý, munaı-gaz hımııasy, munaı óńdeý, farmatsevtıka, agroónerkásiptik keshen, azyq-túlik óndirisi salalarynda 1,1 trln teńge somasyna 160 jobany iske asyryp, 17 myńnan astam turaqty jumys ornyn ashý josparlanǵan», - delingen mınıstrliktiń Telegram paraqshasynda jarııalanǵan aqparatta.

Vedomstvo málimetinshe, jobalardyń basym bóligi Almaty (33 joba) jáne Aqtóbe (20 joba) oblystarynda iske asyrylady. Qarjylandyrý kólemi boıynsha Qaraǵandy (256,4 mlrd teńge) jáne Almaty (230,2 mlrd teńge) oblystary kósh bastap tur.

Otandyq kásipkerler bastamashy bolǵan barlyq jobalar bankterdiń menshikti jáne kredıttik resýrstary esebinen júzege asyrylady.