«Indýstrııalandyrý isinde irkilis bolmaıdy» - respýblıkalyq basylymdarǵa sholý

ASTANA. 23 tamyz. QazAqparat - Qazaq aqparat agenttigi 23 tamyz, seısenbi kúni respýblıkalyq basylymdarda shyqqan ózekti materıaldarǵa sholýdy usynady.

***

«Egemen Qazaqstan» basylymynyń búgingi sanynda «Mıssııa oń baǵasyn berdi» atty maqala jarııalandy. Onda elimizde ótken Parlament Senaty depýtattarynyń saılaýyn baqylaǵan baıqaýshylardyń osy saılaýǵa bergen baǵasyna qatysty máseleler kóterilgen. Basylymnyń jazýynsha, saılaý naýqany kezinde zań buzýshy­lyqtarǵa jol berilmegen. Depýtattyq oryn­ǵa talasýǵa 96 adam nıet bildirse, Or­talyq saılaý komıssııasy solardyń toǵyzyn óz kandıdatýrasyn alyp tas­taýy­na baılanysty tirkemepti. Zańda kór­se­tilgen merzimde tıisti qujattaryn tap­syr­maǵan 27 úmitker de dodadan shyǵyp qalǵan. Al tirkeýge ilingenderdiń ishinen de jıyr­maǵa tartasy óz raı­larynan qaıtatyn­dyqtaryn bildiripti. Senat depýtattary saılaýynyń qorytyndysynan habardar bolyp, saılaýǵa qatysty baıqaýshylardyń pikirlerin bilgińiz kelse, «Egemen Qazaqstan» basylymynyń búgingi sanyn oqyńyz.

Sondaı-aq atalmysh basylymnyń jazýynsha, «Indýstrııalandyrý isinde irkilis bolmaıdy». Osyndaı taqyryppen jarııalanǵan maqalaǵa, keshe Premer-Mınıstr Kárim Másimovtiń tóraǵalyǵymen ótken selektorlyq májiliste kóterilgen máseleler arqaý bolǵan. Basylymnyń jazýynsha, aǵymdaǵy jyldyń birinshi jar­tyjyldyǵynda elimizdiń qaı­ta óńdeý salasynyń negizgi kapıta­ly­na tartylǵan ınvestıtsııa kó­le­mi 11,2 paıyzǵa ósip, 204 mıllıard teńgeni quraǵan. Indýstrııa jáne jańa tehnologııalar mınıstriniń málimdeýinshe, eli­miz­diń ınvestıtsııalyq tartymdy­ly­ǵyn arttyrý jóninde tú­begeıli ınstıtýttyq, zańdyq jáne júıe­lik sharalar boıynsha jan-jaqty jumystar júrgizilgen. Máselen, «Kaznexinvest» ınvestıtsııa jáne eksport jónindegi ulttyq agenttigi» AQ atty ma­mandandyrylǵan kompanııa qury­lyp, osy baǵytta maqsatty jumystardy júrgize bas­tady. Bul kompanııanyń júıeli jumysynyń nátıjesinde, álem­niń barlyq óńirlerindegi ınvestorlarmen 200 ınvestıtsııalyq bastama boıynsha jumystar qol­ǵa alyndy. Búginge deıin elimizge jalpy kólemi 7 mıllıard AQSh dollary shamasynda ınvestıtsııa tartý jóninde kelisimder jasalǵan. Bul másele jóninde keńirek bilgińiz kelse «Egemen Qazaqstan» basylymynyń búgingi sanyn jiberip almańyz.

***

«Aıqyn» basylymynyń búgingi sanynda «Qazaqstan barysy» ulttyń rýhyn kóterdi» atty maqala basyldy. Atalmysh maqalada elimizde Elbasy Nursultan Nazarbaevtyń júldesi úshin qazaq kúresinen uıymdastyrylǵan jarys jóninde jazylǵan. Basylymnyń jazýynsha, «Qazaqstan barysy» dodasynyń bas júldesine 150 myń dollar tigilgen eken. Bul - 22 mıllıon teńge. Bas júlde ıesine mıllıondarmen qosa, «Altyn belbeý» berildi, sol jeńimpazdy tárbıelegen bapkerge 50 myń dollar tabys etildi. Ekinshi tuǵyrǵa taban tiregen balýanǵa 30 myń AQSh dollary kóleminde aqsha usynyldy jáne onyń beline «Kúmis belbeý» taǵyldy. Onyń bapkeri bolsa, 10 myń dollar alady eken. Al úshinshi orynǵa ilikken sportshy 10 myń dollarǵa jáne «Qola belbeýge» ıe boldy. Onyń bapkeri sonyń jartysyndaı, ıaǵnı 5 myń dollar qarjyny ıelenbek. Osy jarystyń nemen aıaqtalǵanyn jáne qalaı ótkenin «Aıqyn» basylymynyń búgingi sanyn bilýge bolady.

Sondaı-aq atalmysh basylymnyń habarlaýynsha, «Qyrǵyz kóligine mingen qazaqtar qýǵyndalady». Osyndaı taqyryppen jarııalanǵan maqalada sońǵy kezderde Almaty qalasynda Qyrǵyzstannyń memlekettik tirkeý nómirin taqqan kólikter kóbeıip ketkendigi aıtylady. Basylymnyń jazýynsha, jol polıtsııasynyń jol erejelerin buzý boıynsha jasaǵan saraptaýyna qaraǵanda, tek sońǵy bir aıdyń ishinde ǵana Qyrǵyzstanda tirkelgen 1500 avtokóliktiń ıelerine ákimshilik jaza qoldanylǵan eken. Kórshi memlekettiń esebinde turǵan avtokólikti minip, jol erejelerin buzǵandardyń 85 paıyzy Qazaqstan azamattary bolyp shyqty. Bul másele jóninde «Aıqyn» basylymynyń búgingi sanynda jazylǵan.

***

«Alash aınasy» basylymy búgingi sanynda «Sozaqtyqtar nege qartaıyp barady?» degen maqala jarııalap, úlken másele qozǵaıdy. Basylymnyń jazýynsha, ońtústiktegi Sozaq aýdany áý bastan-aq ekologııalyq aımaqqa jatady. Ýran kenishi ashylmaı turyp-aq munda halyq densaýlyǵyna keri áser etetin jáıttar jetip artylatyn-dy. Taza aýyzsý máselesi de basty aýyrtar basty máselelerdiń biri bolatyn. Oblys boıynsha shaqqanda da turǵyndarynyń densaýlyǵy tómendigi jóninen aldyńǵy oryndardan kórinip júr. Bul týraly «Alash aınasy» basylymynyń búgingi sanynan keńirek bilýge bolady.

Sondaı-aq atalmysh basylym «Qaınar qasireti» degen taqyryppen taǵy da bir úlken problemalyq maqala jarııalaǵan. Basylymnyń habarlaýynsha, 40 jyl qyrǵyn ákelgen Semeı ıadrolyq polıgonynyń zardaby áli kúnge áserin tıgizip otyr. Polıgon aımaǵyndaǵy eldi mekenderdegi ólim-jitimniń kórsetkishi ortasha respýblıkalyq kórsetkishpen salystyrǵanda eki eseden azaıar emes. Zardap shekkenderdiń densaýlyǵyn qalpyna keltirý maqsatynda neshe túrli is-sharalar jasalǵanymen, ýaqytynan buryn kóz jumyp jatqandar áli de jeterlik. Bul másele jóninde «Alash aınasy» basylymynyń búgingi sanyn bilýge bolady.

***

«Kazahstanskaıa pravda» basylymynyń búgingi sanynda «ıAdroǵa qarsy álemniń kóshbasshysy» atty maqala basty. Basylymnyń jazýynsha, Birikken Ulttar Uıymynyń Bas hatshysy Pan Gı Mýn Elbasy Nursultan Nazarbaevty bıylǵy jyldyń qyrkúıek aıynda Nıý-Iorkte ótetin ıadrolyq qaýipsizdik máselesine arnalǵan sammıtke qatysyp sóz sóıleýge shaqyrdy. Sarapshylardyń pikirlerinshe, mundaı jıyndardyń Qazaqstan basshysynsyz ótýi múmkin emes. Naqtyraq aıtqanda BUU Bas hatshysy ótken jylǵy elimizge sapary barysynda N.Nazarbaevty ıadrolyq qarýsyzdaný úderisin basqara alatyn birden-bir kóshbasshy ekendigin aıtty. Bul másele jóninde «Kazahstanskaıa pravda» basylymynyń búgingi sanynda QR Parlamenti Májilisiniń depýtaty, «Nur Otan» HDP Saıası Keńesiniń múshesi V.Rogalevtiń materıalynda taratylyp jazylǵan.