Indýstrııalandyrý baǵdarlamasy arqasynda aıtarlyqtaı áleýmettik-ekonomıkalyq kórsetkishterge qol jetti - Premer-Mınıstr

ASTANA. 23 qazan. QazAqparat - Indýstrııalandyrý baǵdarlamasy arqasynda aıtarlyqtaı áleýmettik-ekonomıkalyq kórsetkishterge qol jetti. Búgin Parlament Májilisiniń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasyn talqylaý barysynda depýtattar saýalyna jaýap bergen QR Premer-mınıstri Serik Ahmetov osylaı málim etti.

«Údemeli ındýstrııalyq-ınnovatsııalyq damý baǵdarlamasyn Úkimet elimizdi ındýstrııalandyrýdyń eń basty baǵdarlamasy retinde sanaıdy. Osy baǵdarlama arqasynda tórt jyl ishinde salmaqty áleýmettik-ekonomıkalyq damý kórsetkishterine qol jetti. Atap aıtqanda, osy baǵdarlama júzege asqaly bergi úsh jylda ónerkásipte jumyspen qamtylǵandar sany 9 paıyzdan asty, úsh jyl ishinde 550-den astam joba iske qosylyp, olarmen 2 trln. teńgeden astam ónimder shyǵaryldy. Sonymen qatar, osy baǵdarlama aıasynda bıýdjetke túsken salyq 1 trln. teńgeniń shamasynda boldy», - dedi Úkimet basshysy.

Budan bólek, Premer-Mınıstr baǵdarlamanyń keıbir jobalary boıynsha qarajattyń ıgerilmeýi, olardyń jobalyq qýattaryna shyǵa almaýy sekildi problemalardyń oryn alǵanyn da atap ótti. «Alaıda, bul negizinen jergilikti jáne salalyq memlekettik organdarmen retteletin úderis bolýy kerek», - dedi Serik Ahmetov.

Sonymen qatar, Úkimet basshysy ındýstrııalandyrý baǵdarlamasy aıasynda 250-ge tarta ónim túrleri jańadan shyǵarylyp jatqanyn da atap ótti. Al ondaı ónimder álemniń 110-nan astam elderine eksporttala bastaǵan. Budan bólek, ındýstrııalandyrý baǵdarlamasynyń arqasynda elimizde ekonomıkanyń tyń salalary serpindi damý ústinde. «Osy mańyzdy baǵdarlamanyń alǵashqy bes jyldyǵy aıaqtalyp keledi. Osyǵan oraı, Úkimet «Atameken» odaǵy» ulttyq palatasymen birlesip ekinshi besjyldyq tujyrymdamasyn ázirleýde. Sondyqtan da depýtattardy baǵdarlama jobasyn qalystastyrýǵa belsendi túrde qatysýǵa shaqyramyn», - dedi Úkimet basshysy.