Indýstrııa mınıstrligi tehnıkalyq reglamenttiń biregeı qoryn qurýdy usynýda

ASTANA. 10 aqpan. QazAqparat  - Búgin QR Indýstrııa jáne jańa tehnologııalar mınıstrligi men Májilistiń Ekonomıkalyq reforma jáne óńirlik damý komıtetiniń birlesip uıymdastyrýymen ótken dóńgelek ústel otyrysy barysynda elimizdiń keıbir zańnamalyq aktilerine tehnıkalyq retteý jáne metrologııa máseleleri boıynsha túzetýler engizýdi kózdeıtin zań jobasy talqyǵa salyndy.

Esterińizge sala keteıik, atalǵan zań jobasyn ázirleý tehnıkalyq retteý salasyndaǵy ulttyq zańnamany Eýrazııalyq ekonomıkalyq qoǵamdastyqtyń Memleketaralyq keńesiniń 2009 jylǵy 11 jeltoqsanyndaǵy № 27-nshi sheshimimen qabyldanǵan halyqaralyq sharttarǵa sáıkes keltirý qajettiligine negizdelgen.

QR Indýstrııa jáne jańa tehnologııalar vıtse-mınıstri Qanysh Tóleýshınniń aıtýynsha, zań jobasy aıasynda tehnıkalyq reglamentterdiń, standarttar men normatıvti-tehnıkalyq qujattardyń biregeı qoryn qurý kózdeledi.

«Bundaǵy maqsat kásipkerlik sýbektilerine tolyq aqparattar usyný bolyp tabylady. Búgingi kúni qoldanysta kóptegen qujattar, salalyq memlekettik organdar ázirlegen basqa da tehnıkalyq qujattar  barshylyq. Sonyń saldarynan bizdiń kásipkerler naqty aqparat alýda kóptegen qıyndyqtarǵa ushyrap otyr», - deıdi Q. Tóleýshın.

Vıtse-mınıstrdiń aıtýynsha, osyndaı kedergilerdi boldyrmaý maqsatynda zańnama júzinde birqatar jańalyqtar qarastyrylýda. Atap aıtqanda, saýdany ońtaılandyrý, kásiporyndarǵa qarjylyq aýyrtpashylyqty tómendetý sharalary kózdelip, ónimderge qatysty ilespe qujattar sanyn azaıtý josparlanýda. Budan bólek, standarttardy ázirleý jumystaryn ǵylymı-zertteý qyzmetine jatqyzý jóninde másele kóterilip otyr. Óıtkeni, ǵylymı-zertteý salasynda birqatar jeńildikter qarastyrylǵan. Mamandardyń paıymynsha, atalǵan shara kásipkerlerdiń óz betinshe standarttar ázirleýine jáne jalpy bıznestiń jumysyn belsendirýge yntalandyratyn bolady.