Indýstrııa mınıstrligi bıtým baǵasynyń ósýine jol bermeý máselesin pysyqtap jatyr

NUR-SULTAN. QazAqparat – Bıyl kólik ınfraqurylymyn damytý jobalaryna 18 mln tonna qıyrshyq tas, 120 myń tekshe metr temirbeton jáne 1 mln 300 myń tonna bıtým qajet. Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda osy qajettilikter qalaı qamtamasyz etiletinin baıandady, dep habarlaıdy QazAqparat tilshisi.

«Qazir qurylys maýsymyna daıyndyq júrgizilip jatyr. Bıylǵy mindetterdi oryndaý úshin 18 mln tonna qıyrshyq tas, 120 myń tekshe metr temirbeton buıym jáne 1 mln 300 myń tonna bıtým qajet», - dedi vedomstvo basshysy.

Mınıstrliktiń deregi boıynsha, eldegi bıtým zaýyttary jylyna 1 mln tonna ónim shyǵara alady. ıAǵnı, qosymsha 300 myń tonna bıtýmdy syrttan alý qajet degen sóz.

«Qazir qıyrshyq tas pen temirbeton buıymdary tolyq daıyndalǵan. Sondaı-aq, bıtýmnyń 325 myń tonnasy ázirlendi. Jyl saıyn qurylys maýsymynda bıtým tapshylyǵy baıqalyp, naryqta baǵa kóterilip jatady. Bul jumystardyń barysyna áser etpeı qoımaıdy. Qazirgi ýaqytta Energetıka mınıstrligimen bıtýmdy ýaqtyly jetkizý jáne baǵanyń ósýine jol bermeý máselesin pysyqtap jatyrmyz», - dedi Beıbit Atamqulov.

Mınıstr bıylǵy maýsymda 20 myń jol-qurylys tehnıkasy, 81 asfaltbeton zaýyty men 79 usaqtap-suryptaý qondyrǵysy jumyldyrylatynyn atap ótti.

«Jalpy alǵanda, jol-qurylys jumystaryna 200 myńǵa jýyq adam tartylady. Ońtústik óńirlerde qurylys jumystary bastalyp ketti. Aýa-raıy jylynǵannan keıin qurylys jumystary barlyq nysanda bastalady», - dedi sala basshysy.

Eske salsaq, Indýstrııa jáne ınfraqurylymdyq damý mınıstri atalmysh sharada aldaǵy 5 jylda qansha jol salynatyny týraly málimet bergen bolatyn.

Sondaı-aq, bıyl Taldyqorǵan-Óskemen baǵytyndaǵy 768 shaqyrym jolda rekonstrýktsııalaý jumystary aıaqtalatyny belgili boldy.