Indýstrııa mınıstrligi baspana baǵasyn tómendetý boıynsha sharalar qabyldaýda
«Turǵyn úı qurylysynyń ózindik quny qurylys materıaldarynyń baǵasyna tikeleı táýeldi ekendigi belgili. Bul oraıdaǵy onyń úles salmaǵy 60 paıyzǵa deıin. Qazirgi tańda baǵanyń tómendeýi baıqalady. Máselen, armatýra baǵasy 6 paıyzǵa, gaz blogy 3 paıyzǵa, shyny 17,6 paıyzǵa kemigen. Reseılik qurylys materıaldary baǵasyndaǵy dempıngke oraı jaqyn merzimde naryqtaǵy baǵanyń túsýi boljanýda. Qurylysqa qajetti negizgi materıaldardyń qunyna memleket tarapynan turaqty túrde monıtorıng jasalýda. Taldama nátıjesi ár toqsan saıyn monopolııaǵa qarsy organǵa berilýde. Bul jumyspen «Qazaq qurylys jáne sáýlet ǵylymı-zertteý jáne jobalaý ınstıtýty» AQ aınalysýda. Eger de óndirýshiler men jetkizýshiler baǵany negizsiz kótergeni anyqtalsa, tıisti monopolıǵa qarsy sharalar qoldanylatyn bolady», - delingen mınıstrlik habarlamasynda.
Memlekettik ınvestıtsııa esebinen turǵyzylǵan turǵyn úı (1 sharshy metri 160-240 myń teńge aralyǵynda) men áleýmettik nysandar (qurylystyń shekti quny) baǵasyn retteý jáne turǵyn úıdi bekitilgen baǵamen satý shartymen jeke qurylys salýshynyń nysandaryna ınjenerlik-kommýnıkatsııalyq ınfraqurylymdy júrgizý (1 sharshy metri 220-260 myń teńge aralyǵynda) boıynsha birqatar sharalar qolǵa alynýda.
Jalpy alǵanda, Memleket jyljymaıtyn múlik naryǵyndaǵy baǵaǵa baqylaý júrgizbeıdi. Basty sebep – atalǵan naryqtaǵy baǵa suranys pen turǵyndardyń usynysyna oraı ózdiginen retteledi. Baspana quny kóptegen faktorlarǵa baılanysty qalyptasady. Atap aıtqanda, buǵan jer ýchaskesiniń quny, ınfraqurylym, ınjenerlik júıeler, nysannyń ornalasqan jeri, turǵyndar arasyndaǵy suranys pen qurylystyń ózindik quny kiredi.
Turǵyn úı baǵasyn tómendetý maqsatynda otandyq óndirýshilerdiń, sonyń ishinde úı qurylysy kombınattarynyń ónimderin paıdalaný mindettelgen.
Sonymen qatar atalǵan ónimder qoldanylǵan tıptik turǵyn úıler jobasy da daıarlanýda.
Óz kezeginde tıptik jobalardy keńinen qoldaý – jobalaýǵa jumsalatyn shyǵyn kólemin edáýir azaıtady. Bul baspana qurylysynyń ózindik qunyn kemitýge de serpin bermek.