Indýstrııa mınıstri Qytaıdyń 30-ǵa jýyq kompanııasynyń ókilderimen iskerlik kezdesý ótkizbek
Bul týraly QazAqparat mınıstrliktiń baspasóz qyzmetine silteme jasap habarlaıdy.
Baspasóz qyzmetiniń habarlaýynsha, atalǵan sapar Memleket basshysy Qasym-Jomart Toqaevtyń Qazaqstan men Qytaı arasynda saýda-ekonomıkalyq baılanysty nyǵaıtý jónindegi tapsyrmasyn iske asyrý aıasynda ótip jatqanyn aıta ketken oryndy.
QR IIDM basshysy bastap barǵan qazaqstandyq delegatsııanyń quramynda birqatar oblys ákimderi, Kazakh Invest ulttyq kompanııasy men «Qazaqstannyń damý banki» AQ-nyń basshylary, sondaı-aq 180-ge jýyq otandyq kompanııanyń ókilderi bar.
Kórshiles memlekettiń resmı ókilderi men bıznes kompanııalardyń qatysýymen uıymdastyrylǵan iskerlik kezdesýde Marat Kárimjanuly Qazaqstannyń ınvestıtsııalyq tartymdylyǵyn arttyrý boıynsha atqarylyp jatqan jumystar týraly aıtyp berdi.
«Qazir QHR-men ózara baılanysty nyǵaıtý úshin ónerkásip óndirisine basymdyq berilgen. Mysaly, biz mashına jasaý men taý-ken salasynda birshama jetistikke qol jetkizdik.
Sondaı-aq Qytaıdan Eýropaǵa júkterdi tasý úshin Transkaspıı halyqaralyq kólik dálizin damytyp jatyrmyz. Osy maqsatta elimizdiń aýmaǵynda birneshe iri ınfraqurylymdyq jobany iske asyrý qajet», dedi mınıstr.
Ónerkásip baǵytyna sáıkes qazir jalpy quny 16 mlrd dollarǵa 57 birlesken joba qolǵa alynǵan. Al iske asyrylǵan jobanyń sany – 16 (quny 4,4 mlrd dollar). Onyń ishinde shyny óndirisine, Shandong Lovol traktorlaryn qurastyrý men Youtong Bus avtobýstaryn shyǵarýǵa baılanysty birlesken jobalar qamtylǵan. Odan basqa qazir quny shamamen jarty mlrd dollardyń 9 jobasy júzege asyrylyp jatyr. Taǵy qosymsha quny 11 mlrd dollarǵa jetetin 32 jobany júzege asyrý tetikteri pysyqtalyp jatyr.
Beıjińge jasaǵan saparynda QR IIDM basshysy Shanghai Delong Steel Group kompanııasynyń ókilderimen kezdesip, taý-ken salasynda ózara tıimdi qarym-qatynasty arttyrýdyń máselelerin talqylady. Bul kompanııa QHR-da iri metallýrgııalyq kompanııalardyń qataryna kiretinin aıta keteıik. Shanghai Delong Steel Group basshylary elimizde birlesken jobalardy iske asyrýǵa yntaly ekenderin jetkizdi.
Sonymen birge M.Qarabaev kún batareıasynyń óndirisimen aınalysatyn Dahua kompanııasynyń ókilderimen kezdesti. Ekijaqty áńgimeniń barysynda elimizde balama energııa kózderin damytý joldary qaraldy. Budan keıin QR Indýstrııa jáne ınfraqurylymdyq damý mınıstrimen China Railway Highspeed kompanııasynyń basshylary kezdesýge múmkindik alyp, onyń barysynda temirjol kóligi ónerkásibine baılanysty yntymaqtastyqty nyǵaıtý máseleleri qarastyryldy. Budan basqa vedomstvo basshysy elektrmobılderdi shyǵarýmen tanymal Zeekr kompanııasynyń basshylarymen de kezdesip, Qazaqstanda avtokólik óndirisine baılanysty birlesken jobany qolǵa alýdyń múmkindikteri pysyqtaldy.
Tutastaı alǵanda, mınıstrdiń úshkúndik sapary kezinde 30-ǵa jýyq qytaılyq kompanııanyń ókilderimen iskerlik kezdesýler ótkizilip, sondaı-aq eki eldiń kásipkerleri B2B formatyna sáıkes ózara tıimdi qatynasty keńeıtýdiń tetikterin talqylaıdy dep josparlanǵan.