Indýstrıaldy-ınnovatsııalyq damýdyń ekinshi besjyldyǵynyń basty mindeti - óńdeý ónerkásibin shıkizat salasynyń deńgeıine jetkizý - N.Nazarbaev

ASTANA. QazAqparat - Indýstrıaldy-ınnovatsııalyq damýdyń ekinshi besjyldyǵynyń basty mindeti - óńdeý ónerkásibin shıkizat salasynyń deńgeıine jetkizý. Bul týraly búgin Astanadaǵy Táýelsizdik saraıynda ótken Indýstrııalandyrý kúni aıasyndaǵy jıyn barysynda Elbasy Nursultan Nazarbaev aıtty.

«Biz bastap otyrǵan ındýstrıaldy-ınnovatsııalyq damýdyń ekinshi besjyldyǵynyń basty mindeti - óńdeý ónerkásibin shıkizat salasynyń deńgeıine jetkizý, birtindep odan da asyp túsý. Qazaqstan álemdik úzdikter alamanynan óz ornyn ıelenip, óz nesibesin alýy tıis. Biz tańdaǵan ındýstrııa men ınnovatsııa damýdyń Nurly joly bolyp sanalady», - dedi N.Nazarbaev.

QR Prezıdenti óndiristi damytý - eldi damytý, óndiristi nyǵaıtý - táýelsizdikti nyǵaıtý ekendigin basa aıtty.

«Sondyqtan bul salaǵa jumsalǵan árbir tıyn, bul baǵytta istelgen árbir sharýa mándi. Osyny kókeıge túıip júreıik», - dedi Elbasy.