InDrive júrgizýshileriniń demalys ýaqyty rettele me

<p>ASTANA. KAZINFORM &ndash; Kólik mınıstrligi basshylyǵy taksıge tapsyrys berýge arnalǵan mobıldi qosymshalar operatorlarymen jıi kezdesip, tasymaldaý boıynsha máselelerdi birlese sheshýge nıetti.&nbsp;</p>

Ótken aıda Kólik mınıstri Marat Qarabaevtyń tóraǵalyǵymen «ıAndeks» jáne inDrive ókilderimen kezdesý ótken bolatyn. Keńes barysynda taksı tasymaldaýshylarynyń avtomobıl kóligi salasyndaǵy zańnama normalaryn saqtaýyn qamtamasyz etý jáne jolaýshylar tasymaly qaýipsizdigi boıynsha ishki korporatıvtik talaptardy engizý qajettiligine qatysty máseleler kóterilgen edi.

Keńes qorytyndysy boıynsha taksıge tapsyrys berýdiń mobıldi qosymshalary operatorlarynyń ókilderine avtomobılmen jolaýshylardy tasymaldaý salasynyń problemalyq máselelerin sheshý boıynsha usynystar engizý usynyldy.

Jýyrda kólik vıtse-mınıstri M.Qalıaqparovtyń tóraǵalyǵymen inDrive servıs operatorynyń ókilderimen kezdesý ótti. Keńes barysynda jolaýshylardy zańsyz tasymaldaýdyń jaǵymsyz tustaryn kórsete otyryp, jol-kólik apattary boıynsha statıstıka kópshilik nazaryna shyǵaryldy. Osyǵan baılanysty kompanııaǵa júrgizýshilerdiń eńbek jáne demalys rejımin saqtaý boıynsha talaptardy kúsheıtý usynyldy.

Kelissózderdiń qorytyndysy boıynsha mobıldik qosymsha operatorynyń taksı tasymaldaýshylarynyń avtomobıl kóligi salasyndaǵy zańnama talaptaryn saqtaýyn qamtamasyz etý jónindegi sharalardy kezeń-kezeńimen qabyldaýyna baǵyttalǵan Kólik mınıstrligi men inDrive operatory arasyndaǵy yntymaqtastyq jáne ózara is-qımyl týraly memorandým jasasý qajettiligi týraly sheshim qabyldandy. 

Qazirgi ýaqytta atalǵan memorandýmnyń jobasy ázirlenip jatyr.