Indonezııada bolǵan kóshkin men seldiń saldarynan 10 adam qaza tapty

ASTANA. QazAqparat - Indonezııanyń basty araldarynyń biri - ıAvanyń batys bóliginde bolǵan kóshkin men seldiń saldarynan kem degende 10 adam mert boldy. Taǵy 30 adam túrli dene jaraqattaryn aldy, dep jazady newsru.com.

Bul týraly sársenbi kúni Tabıǵı apattardyń saldarymyn kúres jónindegi Ulttyq basqarmanyń aqparat ortalyǵynyń (BNPB) basshysy Sýtopo Pýrvo Nýgroho (Sutopo Purwo Nugroho) habarlady.

«Búginde qutqarýshylar qarýly kúshtermen, polıtsııa jáne eriktilermen birlesip, izdestirý-qutqarý jumystaryn júrgizip jatyr», deıdi ortalyq basshysy. Onyń sózderin Detik.com aqparattyq ınternet-portaly keltirdi.

ıAva aralynyń batys bóligindegi Garýt aýdanynda jaýǵan nóser jańbyr sý tasqynynyń oryn alýyna yqpal etti. Munda sý deńgeıi keı jerlerde eki metrge jetken. Garýtta segiz adam mert bolyp, bireýi iz-túzsiz joǵaldy, tórteýi aýyr jáne 26-sy jeńil jaraqat aldy. Júzdegen jergilikti turǵyn baspanasyz qaldy.

Mamandar Indonezııadaǵy jaýyn-shashyn maýsymyndaǵy kóshkinderdi ormandardaǵy aǵashtardyń kóp shabylýymen baılanystyrdy.