Indonezııada 50 jastaǵy áıeldi pıton jutyp qoıdy
Farıda esimdi 50 jastaǵy áıel, tórt balanyń anasy Kalempang aýylynda úıiniń janyndaǵy ormanda joǵalyp ketken. Ol baqshasyndaǵy kókónisterdi satý úshin bazarǵa bara jatqan.
Túnde qaıtyp kelmegen soń Farıdanyń kúıeýi ýaıymdap, kórshilerimen birge ony izdeýge kirisedi. Olar kelesi kúni butalardyń arasynan ishi qatty úlkeıgen alty metrlik alyp pıtondy tapqan. Budan kúdiktengen aýyl turǵyndary terisin kesip, áıeldi jylannyń ishinen taýyp aldy.
Farıdanyń kúıeýi Nonı áıeliniń jalǵyz ketýine ruqsat bergeni úshin qatty ókinetinin aıtady.
«Eger men sol kúni onymen bolǵanymda, pıton oǵan jaqyndaýǵa batyly jetpes edi. Onyń qandaı azap shekkenin elestete de almaımyn. Qatty ókinemin», - deıdi ol.
Mundaı jaǵdaı Indonezııada birinshi ret bolyp otyrǵan joq. 2022 jyly Sýmatra aralyndaǵy Djambı provıntsııasynda pıton Djara esimdi áıeldi túgelimen jutyp qoıǵan. Ol plantatsııaǵa jumysqa ketip, sol kúni keshke úıine oralmaǵan. Ony da aýyl turǵyndary izdep, alyp pıtonnyń ishinen shyǵaryp alǵan edi.
«Jábirlenýshi jylannyń asqazanynan tabyldy», - dedi jergilikti polıtsııa basshysy sol kezde jergilikti BAQ-qa.
Tabylǵan kezde onyń denesi zaqymdalmaǵan bolyp shyqty. Alaıda mundaı jaǵdaı óte sırek kezdesedi. 2017 jyldan beri Indonezııada tórt adam osylaı kóz jumǵan.
Torly pıton (Malayopython reticulatus) – álemdegi eń uzyn jylan. Onyń mólsheri 6,25 metrden asady. Ǵylymǵa súıensek, kólemi 10 metr eń uzyn torly pıton 1912 jyly tabylǵan.
Torly pıtondar Ońtústik-Shyǵys Azııada mekendeıdi. Indonezııanyń qalalyq órkenıetten alys djýnglılerinde torly pıtondardyń úlken popýlıatsııasy bar. Olar jaqsy júzedi, keıde tipti ashyq teńizge de júzedi. Sonymen qatar keshke jáne túnde ań aýlaǵandy, joryqqa shyqqandy jón kóredi. Al kúnin aǵashtardyń janynda nemese úńgirlerde ótkizedi.