Indonezııa kompanııalary Qazaqstannyń taý-ken salasyna ınvestıtsııa salmaq

ASTANA. QazAqparat - Indonezııa kompanııalary Qazaqstannyń taý-ken salasyna ınvestıtsııa salýdy josparlaýda. Bul týraly búgin Aqordada QR Prezıdenti Nursultan Nazarbaevqa senim gramotasyn tapsyrǵannan keıin BAQ ókilderine suhbat bergen atalǵan eldiń Tótenshe jáne Ókiletti Elshisi Rahmat Pramono málim etti, dep habarlaıdy QazAqparat.

«Jeke sektorda ındonezııalyq eki kompanııa Qazaqstannyń framatsevtıka men taý-ken salasyna ınvestıtsııa salýdy josparlap otyr», - dedi Indonezııa Elshisi.

Rahmat Pramono óz sózinde eki eldiń arasyndaǵy yntymaqtastyqtyń qarqyndy damyp kele jatqandyǵyn jáne óte joǵary deńgeıde ekendigin basa aıtqan bolatyn. Munan bólek, ol Qazaqstan men Indonezııa arasyndaǵy ózara qarym-qatynasty odan ary damytyp, nyǵaıtýǵa bar kúsh-jigerin jumsaıtyndyǵyn atap ótken edi.

Aıta keterligi, Indonezııa Elshisinen senim gramotasyn qabyldaǵan Qazaqstan Prezıdenti Astana men Djakarta arasyndaǵy saıası, halyqaralyq máselelerdegi  kózqaras birdeıligin, eki memlekettiń saýda-ekonomıkalyq qarym-qatynastarynyń áleýeti joǵary ekendigin, bul saladaǵy yqpaldastyqty damytýda eki el úkimetteriniń belsene qyzmet atqarýy tıistigin aıtqan bolatyn.