Indonezııa Qazaqstanda avtoshınalar óndirisin bastaýǵa nıetti
«Bizde ekijaqty saýda-ekonomıkalyq qatynastardy damytý úshin zor múmkindik bar. Eki jyl buryn bizdiń mınıstrlik delegatsııasy Qazaqstanda boldy, sodan keıin biz osy kooperatsııany jalǵastyrýǵa jáne kúsheıtýge ýaǵdalastyq. Meniń oıymsha, ony damytýdyń áleýeti mol. Qazir de Eýrazııalyq ekonomıkalyq forým alańdarynda kelissózder júrgizip, aıtylǵan ýaǵdalastyqtardy iske asyrý eki el arasyndaǵy ózara is-qımyldy kúsheıtý úshin jaǵdaı jasaıtynyn túsinemiz», - dedi arnaıy keńesshi Rızal Affandı.
Ol Qazaqstannyń Indonezııaǵa kóptegen taýar jetkizetinin, jalpy ımportta eleýli úlesti ıelenetinin atap ótti. Óz kezeginde Indonezııa olardy ishki naryq úshin de, Afrıka men Taıaý Shyǵys elderine taýarlardy eksporttaý úshin de paıdalanady.
Sonymen qatar, birlesken jumys úshin zor áleýet birlesken ónerkásiptik óndiris salasyndaǵy kooperatsııa perspektıvalarymen de baılanysty.
«Qazir biz Qazaqstan aýmaǵynda avtomobıl shınalaryn óndirý jobasyn iske asyrý múmkindigin zerttep jatyrmyz. Bul ıdeıany júzege asyrý bizdiń saýda-ekonomıkalyq yntymaqtastyǵymyzǵa jańa serpin beredi dep sanaımyn», - dep atap ótti R. Affandı.
Indonezııa ókili Astana men Djakartanyń halyqaralyq qatynastardyń kóptegen máseleleri boıynsha uqsas saıası kózqarastary bar ekenin aıtty.
«Bizde qandaı da bir saıası qaıshylyqtar joq, Indonezııa álemniń kóptegen elderimen dostyq qarym-qatynasta, bizdiń jaýymyz joq. Bul rette bizdiń elderde saýda-ekonomıkalyq qatynastardy damytýda zor múmkindik bar, eń bastysy – yntymaqtastyǵymyzdy nyǵaıtý. Elder arasyndaǵy tildik kedergini eńserip, Indonezııa men Qazaqstan arasyndaǵy aqparattyq keńistikte jańa kópirler qalyptastyrý qajet», - dep túıindedi arnaıy keńesshi.