Indonezııa Qazaqstan azamattary úshin vıza rejımin jeńildetti
Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda, Indonezııanyń Zańdar jáne adam quqyqtary mınıstrliginiń Kóshi-qon jónindegi bas dırektoraty 2023 jylǵy 18 qańtardan bastap Qazaqstan azamattary atalǵan vıza túrin alýǵa quqyly elder tizimine engizdi.
«Kelgen boıda beriletin vızany» Indonezııaǵa ushyp kelgende áýejaıda nemese molina.imigrasi.go.id saıtynda Indonezııaǵa ushpas buryn rásimdeýge bolady. Ol úshin tómendegi qujattar qajet:
shekaradan ótý sátinde qoldanylý merzimi keminde 6 aıdy quraıtyn pasport;
keri áýe bıleti nemese úshinshi elge ushý úshin alynǵan bılet;
koronavırýs ınfektsııasyna qarsy vaktsınatsııa sertıfıkaty (kem degende eki doza qajet), bul rette ekinshi komponentpen vaktsınatsııalaý shekarany naqty kesip ótý kúnine deıin keminde 14 táýlik buryn júrgizilgen bolýy tıis. Bul talap 18 jasqa tolǵan tulǵalarǵa qoldanylady. 18 jasqa tolmaǵandar úshin vaktsınatsııa sertıfıkatynyń bolýy talap etilmeıdi.
«Kelgen boıda beriletin vızanyń» quny 500 myń ındonezııalyq rýpııa (shamamen 35 AQSh dollary). Vıza áýejaıda rásimdelgen jaǵdaıda vızalyq alymdy tóleý «Bank Rakyat Indonesia» ústelshesinen júzege asyrylady (AQSh dollarymen de, ındonezııalyq rýpııamen de tóleýge bolady).
«Kelgen boıda beriletin vıza» Indonezııada 30 táýlik ishinde bolýǵa múmkindik beredi, ony turý orny boıynsha ornalasqan kóshi-qon qyzmeti bólimshesinde dál osyndaı merzimge bir ret uzartýǵa bolady.
Foto: .gov.kz