Indıra Rystına: Abaıdyń sózi qazir de, keleshekte de mańyzyn joımaıtyny haq

NUR-SULTAN. QazAqparat – L.N.Gýmılev atyndaǵy Eýrazııa ulttyq ýnıversıtetiniń saıasattaný kafedrasynyń meńgerýshisi, PhD doktory, Abaı murasyn halyqaralyq deńgeıde nasıhattaý jobasynyń jetekshisi Indıra Rystına Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasyna qatysty pikir bildirdi, dep habarlaıdy QazAqparat tilshisi.

«Qazaqstan Respýblıkasynyń Prezıdenti Qasym-Jomart Kemeluly Toqaevtyń «Abaı jáne XXI ǵasyrdaǵy Qazaqstan» atty maqalasy jaryq kórdi. Bul maqalanyń ereksheligi – Abaı shyǵarmashylyǵynyń zamanaýı úlgisiniń kórinisi aıqyn jazylǵan. Qazirgi kezdegi máseleler Abaı óleńderiniń prızmasy arqyly qarastyrylady. Bul kezde asa mán berip aıtqym kelgeni: bilim, ǵylym jáne til máseleleriniń Abaı óleńderindegi sıpaty búgingi zamanaýı Qazaqstannyń qajettigin ashyq ári jarqyn túrde kórsetedi. Mysaly, bizdiń qazir ómir boıy bilim alý kerek degen qaǵıdamyz bar. Ol – qazirgi qaǵıda dep esepteledi. Eger Abaı óleńderin taldar bolsaq, árdaıym bilim alý kerek. «Jasymda ǵylym bar dep eskermedim» dep aıtqan bir sózi ǵylymnyń erte kezden bastaý alýy kerektigin aıqyndaı túsedi», - deıdi ol.

Indıra Rystına atap ótkendeı, byltyr Qazaqstanda Jastar jyly aıasynda jas ǵalymdarǵa arnalǵan arnaıy ǵylymı jobalardyń granttary jarııalandy.

«Ǵylymdy jas kezinen bastap dáripteý» degen Abaıdyń sózi qazir de, keleshekte de mańyzyn joımaıtyny haq. «Pedagog mártebesi týraly» qabyldanǵan zańda oqytýshyǵa degen qurmet aıtylǵan. Al, bul Abaı óleńderinde árdaıym kórinis taýyp otyrady. Sondyqtan Abaıdyń búgin dáriptelýi, Abaı murasyna oralýymyz jaıly jazylǵan Prezıdentimizdiń maqalasy óte oryndy dep esepteımin. Qazaq halqyna, qazaq jastaryna Abaıdy oqý, Abaıdyń jetistikteri men onyń nasıhatyn jetkizý – bizdiń zamanymyzdyń, bizdiń ǵasyrymyzdyń birden-bir mindeti», - deıdi ol.

Eske sala ketsek, «Egemen Qazaqstan» gazetiniń búgingi sanynda QR Prezıdenti Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasy jarııalanǵan bolatyn.