Іndettiń kólik salasyna teris áserine qaramastan jekelegen baǵyttarda ósim bar – Beıbit Atamqulov
«Kólik salasynda naqty kólem ındeksi 2020 jyldyń 9 aıynda 82,9 paıyzdy qurady. Konteınerlerdiń tranzıt tasymaly ótken jyldyń osy kezeńimen salystyrǵanda 36 paıyzǵa artyp, 637,2 myń jıyrma fýnttyq konteınerdi qurady. Kóliktiń barlyq túrimen júk tasymaldaý kólemi 2,8 mlrd tonnany nemese ótken jylmen salystyrǵanda 92,6 paıyzdy qurady», - dedi mınıstr.
Onyń aıtýynsha, pandemııanyń kólik salasyna teris áserine qaramastan, jekelegen baǵyttarda ósim boldy. 2020 jyldyń qyrkúıeginde tasymaldanǵan jolaýshylar sany bıylǵy tamyz aıymen salystyrǵanda 16,3 paıyzǵa ósti. Áýemen jolaýshylar tasymaly 11,5 paıyzǵa artyp, 610 myń adamdy qurady.
«Qytaı-Eýropa-Qytaı baǵytynda konteınerlik tasymaldar 2,2 paıyzǵa nemese 1100 jıyrma fýnttyq konteınerge artyp, 50 800 jetti. Júk tasymaly salasynda da ósim bar. Atap aıtqanda, qyrkúıek aıynda júk tasymalynyń jalpy kólemi tamyzben salystyrǵanda 0,9 paıyzǵa ósti», - dedi Beıbit Atamqulov.