Inder aýdanyndaǵy eldi mekenderdiń turǵyndary Inderbor kentine qaıyqpen qatynaıdy
Inder aýdanynyń ákimi Daryn Shamuratovtyń aıtýynsha, Atyraý-Oral trassasynan Inderbor kentine baratyn 7 shaqyrym joldy qalpyna keltirý bastalǵan. Bul joldy 13 mamyrda Jaıyq ózeninen saıǵa quıylǵan tasqyn sý shaıyp ketken edi.
«Atalǵan jol qaýipsizdik maqsatynda ýaqytsha jabyldy. Búgin joldy qalpyna keltirý jumysy bastaldy. Jol qalpyna keltirilgenshe, eldi mekender turǵyndarynyń aýdan ortalyǵy – Inderbor kentine qatynaýyn uıymdastyrý úshin 15 mamyrda arnaıy qaıyq shyǵarylady. Turǵyndardy qaıyqpen tańerteńgi 9:00-den keshki 19:30 aralyǵynda tasymaldanady», -dep habarlady Daryn Shamuratov.
Sondaı-aq, Inderbor kentindegi ortalyq kópir men qaıyq toqtaıtyn oryn aralyǵynda arnaıy marshrýtpen qoǵamdyq kólik júredi.
Eske sala ketelik, budan buryn Atyraý - Oral trassasynan Inderborǵa burylatyn 7 shaqyrym joldy tasqyn sý shaıyp ketken edi.