Inder aýdanynda Jaıyqtyń deńgeıi sál tómendedi, biraq qaýip áli seıilmeı tur
Inder aýdanynyń ákimi Daryn Shamuratov tasqyn sýdan tónýi múmkin qaýiptiń seıilmeýiniń birneshe sebebin atady.
«Sońǵy kúnderi sý deńgeıiniń birtindep tómendegeni týraly aqparat berildi. Degenmen tómendeý kórsetkishi aıqyn kórinbeı otyr. Sondyqtan qaýip ázirge seıilgen joq. Birinshiden, 12 mamyr kúni Inderbor kentindegi bóget janynan shyqqan sý áli toqtaǵan joq. Sol sýdy nasospen Jaıyq ózenine keri quıyp júrmiz. Sýdyń shyqqan kózin bitep kórgende, basqa jerden sý jaryp shyqty. Aǵa býyn ókilderiniń pikirinshe, osy shamada keńes dáýirinen qalǵan eski turbalar men shahtalar bar. Ekinshiden, bóget boıyndaǵy órt sóndirý beketinen «Bastaý» meıramhanasyna deıingi shamamen 700 metrdeı aralyqta syz, dymqyl baıqaldy. Buǵan qosymsha saıabaq aýmaǵyndaǵy tal egýge qazylǵan shuńqyrlardan jerasty sýy ónip tur», -dedi Daryn Shamuratov.
Onyń aıtýyna qaraǵanda, qazir Inderbor kentindegi bógetti qosymsha bekitý jumysy júrgizilip jatyr. Sondaı-aq, shirkeý men saıabaqtyń aldyńǵy jaǵynan taǵy bir bóget soǵylady.
«Biz aldymen turǵyndardyń, bógetti nyǵaıtyp júrgen azamattardyń qaýipsizdigin saqtaýǵa kóńil aýdaryp otyrmyz. Sebebi bıyl soǵylǵan jańa bógettiń keı tusy ortasynan jarylyp, qapshyqtar qulady. Degenmen Jaıyq ózeniniń deńgeıi sońǵy eki kúnde -2-4 santımetrge tómendedi. Biraq ózen arnasynyń qaýipti deńgeıden 2 metrge jýyq asqanyn eskersek, maýsym aıy bastalǵanǵa deıin bosańsýǵa jol berýge bolmaıdy», -dedi Daryn Shamuratov.
Eske sala ketelik, buǵan deıin Inder aýdanyndaǵy eldi mekenderdiń turǵyndary Inderbor kentine qaıyqpen qatynaıtynyn jazǵan bolatynbyz.