Importtyq ónimderdi qatań tekserip otyrý qajet - otandyq taýar óndirýshiler

ASTANA. QazAqparat - Qazaqstannyń taýar óndirýshileri syrttan keletin tamaq ónimderin qatań baqylaýdy surap otyr. Áıtpese, otandyq ónimderdi birneshe ret tekseristen ótkizedi. Al sheteldiń taýarlary tek dúkenge túskende ǵana tekseriledi. Oǵan bıýdjettiń qarjysy jumsalady, dep xabarlaıdy QazAqparat tilshisi.

Qazaqstannyń jumyrtqa ónimderin óndirýshileri qaýymdastyǵy ımporttyq taýarlardy óz esebinen tekserýdi usynyp otyr. Óıtkeni keıbir aımaqtarda bıýdjet tapshylyǵynan, bolmasa, adam jetispeýshiliginen syrttan keletin taýarlar tekserilmeı jatady. Al ımporttyń ishinde sapasyz tamaq ónimderi az emes. «Máselen, otandyq ónimder birneshe tekseristen ótedi. Zańǵa sáıkes, kásiporynnyń ózinde bir tekseris bar. Veterınarlyq baqylaý aı saıyn jasalady. Sosyn biz óz erkimen toqsan saıyn qoǵamdyq densaýlyqty saqtaý komıtetine synama tapsyramyz. Demek, Qazaqstannyń taýar óndirýshilerin únemi tekserip otyrady. Al ımporttyq taýarlar óz qujattarymen keledi. Biraq bizdiń organdar kóp tekseris jasamaıdy. Densaýlyq saqtaý mınıstrligi synama alady. Oǵan bıýdjetten aqsha da bólinedi. Al qarjy tapshylyǵy men maman jetispeýshiligi saldarynan árbir óńirde ondaı sharalardy atqarý ońaı emes. Bizdińshe, syrttan kelgen taýarlardy ımporterlerdiń esebinen tekserý kerek. Ókinishke qaraı, qazirgi zańnamada ondaı norma joq», - dedi qaýymdastyqtyń basshysy Maksım Bojko «Atameken» UKP-synda ótken kezdesýde.

QR Densaýlyq saqtaý mınıstrligi ımporttyq taýarlardy tekserý sharalaryna bıýdjet qarajatynyń jumsalatynyn rastady. Qoǵamdyq densaýlyqty saqtaý komıtetiniń tóraǵasy Jandarbek Bekshınniń aıtýynsha, aǵymdaǵy jyly tamaq ónimderin tekserýge 80 mln teńge qarastyrylǵan.

Otandyq taýar óndirýshileri shekarada veterınarlyq baqylaýdy engizý kerek dep sanaıdy. Turaqty beketter bolmasa da, jyljymaly zertxanalardy uıymdastyrýǵa bolady. «Árıne, árbir partııany tekserý qıyn. Degenmen, naqty bir talap bolýy qajet. Eger belgili bir ımporterdiń ónimi sapasyz bolyp shyqsa, onda kelesi joly onyń taýarlaryn elimizge kirgizbeý kerek. Endi, biz Eýrazııalyq ekonomıkalyq odaq múshelerine shekteý qoıa almaımyz. Degenmen, shekarada veterınarlyq tekseristi uıymdastyryp, kórshi memleketterdiń taýarlaryn baqylap otyrýǵa bolady nemese jyljymaly veterınarlyq zertxanalardy qolǵa alýǵa bolady. Ondaı tájirıbe Reseıde bar», - dep atap kórsetti M.Bojko.

Aıta keteıik, búgin Bas sanıtarlyq dáriger Jandarbek Bekshın otandyq qus etin jeýge keńes berdi. Sebebi Reseı men Belarýstan kelgen taýyq etinen salmonella taıaqshasy tabylǵan. Densaýlyqqa qaýipti ónim birneshe oblysqa tarap ketti.