Importty almastyrýdyń 2025 jylǵa deıingi baǵdarlamasy daıyndalyp jatyr
«Importty almastyrý máselesi Memleket basshysynyń turaqty baqylaýynda. Qazirgi geosaıası jaǵdaıdy eskeretin bolsaq, bizdiń ekonomıkamyz úshin ımporttyq ónimderdi almastyrýdyń mańyzy óte zor. Búginde memlekettik jáne kvazımemlekettik sektorlar men jer qoınaýyn paıdalanyp otyrǵan kompanııalardyń bizdiń elimizde shyǵatyn taýarlar men jumystardy, qyzmetterdi satyp alý úlesi 52 paıyzdy qurasa, onyń ishinde qazaqstandyq qamtýdyń naqty úlesi 40 paıyzdan aspaıdy. Budan bólek, ótken jyly ımport shamamen 8 paıyzǵa ósken», - dedi Álıhan Smaıylov.
Úkimet basshysynyń dereginshe, ımporttyń basym bóligi – qosylǵan quny joǵary ónimder bolsa, eksporttyń deni – negizinen óńdelmegen ónimder.
«Básekege qabiletti ekonomıka quramyz desek, biz osy bir úrdisti túbirimen ózgertýimiz kerek. Bul jerde naryqty otandyq ónimdermen qamtamasyz etý arqyly ımportty almastyrý saıasaty oń yqpal etýi tıis. Osyǵan oraı, Memleket basshysynyń tapsyrmasy boıynsha Importty almastyrýdyń 2025 jylǵa deıingi baǵdarlamasy daıyndalyp jatyr. Baǵdarlama aıasynda qazaqstandyq qamtý úlesin 60 paıyzǵa deıin jetkizý josparlanǵan. Eń bastysy, bul jańa óndiristerdiń damýyna serpin berip, 116 myń jańa jumys ornyn qurýǵa múmkindik beredi. Sondaı-aq, iri ınvestıtsııalyq jobalardy iske asyratyn kompanııalardyń aınalasynda shaǵyn jáne orta kásiporyndardyń beldeýi qurylyp, olar óndiristiń damýyna mýltıplıkatıvtik áser beredi. Bul óz kezeginde, óńirlerdiń áleýmettik-ekonomıkalyq damýyna oń yqpal etedi», - dedi Premer-Mınıstr.