Importty almastyrý – otandyq bıznesti damytýǵa mol múmkindik – Álıhan Smaıylov
«Búgingi tańda Úkimet kásipkerlikti qoldaý sharalaryn júzege asyryp jatyr. Keıingi 5 jylda shaǵyn jáne orta bıznestiń JІÓ-degi úlesi 27%-dan 35%-ǵa deıin ulǵaıdy», - dedi Premer-Mınıstr kórmeniń ashylý saltanatynda.
Sonymen qatar, Premer-Mınıstr shaǵyn jáne mıkrokásipkerlik sýbektilerine tekserý júrgizýge Memleket basshysy jarııalaǵan moratorıı elimizde bıznes erkindigin qamtamasyz etýge oń áser etkenin atap ótti.
Óndiristiń qaıta óńdeý salasyndaǵy ımporttyń ótken jyly $38 mlrd bolǵanyn eskersek, kásipkerler úshin ony almastyrý - keleshegi zor baǵyttardyń biri bolyp otyr.
«Bul - bizdiń otandyq óndirýshilerge óz isin damytýǵa jáne jańa taýarlardyń óndirisine ınvestıtsııalar baǵyttaý úshin úlken múmkindik beredi. Búginde Úkimet 717 ınvestıtsııalyq jobanyń pýlyn qurdy, olardyń 286-sy – 9,9 trln teńge somasyna ımportty almastyratyn jobalar», - dedi Álıhan Smaıylov.
Úkimet basshysy 2022 jyly jalpy quny 1,7 trln teńge bolatyn 165 jobany iske asyrý josparlanǵanyn atap ótti. Osyndaı ár jobanyń aınalasynda shaǵyn jáne orta bıznes kompanııalarynyń beldeýi damıtyn bolady.
Sondaı-aq, bızneske ákimshilik júktemeni tómendetýge múmkindik beretin Kásipkerlik salasyndaǵy retteýshilik saıasat jónindegi zań qabyldandy. Úkimet bıznes júrgizý jáne naryqtaǵy monopolııalardy joıý úshin básekelestik aıasyn keńeıtý jumystaryn jalǵastyryp jatyr. Otandyq kompanııalardyń kvazımemlekettik sektordyń satyp alýyna qol jetkizýdi jeńildetý baǵytynda belsendi jumys júrgizýde.
«Memleket basshysy atap ótkendeı, bılik pen bıznestiń syndarly ózara is-qımyly áleýmettik-ekonomıkalyq turaqtylyqtyń negizin quraıdy. Osy baǵytta Úkimet kásipkerlerdi memlekettik qoldaý sharalarynyń tıimdiligi men ashyqtyǵyn arttyrý boıynsha jumysty belsendi túrde jalǵastyratyn bolady», — dedi Álıhan Smaıylov.
Ashylý rásimi aıaqtalǵannan keıin Premer-Mınıstr kórme zalynda bolyp, otandyq taýar óndirýshilerdiń stendterimen tanysty. Bıyl Ulttyq Ónim kórmesine «Damý» kásipkerlikti damytý qory («Báıterek» holdınginiń enshiles uıymy) arqyly memlekettik qoldaý alǵan otandyq mıkro, shaǵyn jáne orta bıznestiń 350-den astam ókili qatysady.
Sonymen qatar, kórmege kelýshilerge «Halyq tańdaýy» degýstatsııalyq konkýrsy, jetekshi otandyq óndirýshilerdiń áıelder jáne erler kıimderiniń toptamalarynyń kórsetilimi uıymdastyrylady. Kórme aıasynda kásipkerlerge Franchaızıngtik kompanııalardyń forýmy, iskerlik kelissózder men ártúrli sheberlik synyptary uıymdastyrylady, onda belgili kásipkerler bilimderi men tájirıbelerimen bólisedi.