Imıdjdik sharalardan bas tartý: únemdelgen qarjy qaıda jumsalady

<p>ASTANA. KAZINFORM &ndash; Prezıdent tapsyrmasy boıynsha birqatar is-shara ótpeıtin boldy. Eske sala ketsek, bıyl Memleket basshysy elimizdiń birqatar óńirindegi sý tasqynyna baılanysty qalyptasqan kúrdeli jaǵdaıdy eskere otyryp, sondaı-aq bıýdjet qarjysyn únemdeý maqsatynda Úkimetke, ortalyq memlekettik jáne jergilikti atqarýshy organdarǵa ımıdjdik jáne basqa da iri is-sharalardy ótkizbeý jóninde tapsyrma berdi.</p>

Osy oraıda Kazinform agenttigi Qarjy mınıstrliginen naqty qandaı ımıdjdik is-sharalardyń ótpeıtindigi jáne qansha qarjy únemdelgeni týraly suraǵan edi.

«Elimizdiń bıýdjet zańnamasyna sáıkes respýblıkalyq jáne jergilikti bıýdjet derbes jumys isteıdi. Birqatar óńirdegi qalyptasqan jaǵdaıǵa baılanysty Memleket basshysy ortalyq memlekettik jáne jergilikti atqarýshy organdarǵa ımıdjdik jáne basqa da iri is-sharalarǵa arnalǵan shyǵystardy qaıta qaraýdy tapsyrdy», - delingen agenttik joldaǵan resmı saýaldyń jaýabynda.

Sonymen Prezıdent tapsyrmasynan keıin, ótpeıtin bolǵan is-sharalar:

- Astana halyqaralyq ekonomıkalyq forýmy; 

- Ekologııa máseleleri boıynsha Azııadaǵy ózara is-qımyl jáne senim sharalary jónindegi keńes (AÓSShK); 

- «Ortalyq Azııa plıýs Japonııa» sammıti sheńberinde Ortalyq Azııa elderi men Japonııanyń ekologııa mınıstrleriniń kezdesýi.

«Osyǵan baılanysty, ortalyq memlekettik organdar naqty kórsetilgen qyzmetterge sáıkes jumsalǵan shyǵystardy eskere otyryp, tıisti is-sharalardyń kúshin joıý jáne bıýdjet qarajatyn qaıtarý boıynsha jumys júrgizýde», - deıdi vedomstvodan.

Qarjy mınıstrligi únemdelgen qarajatty barynsha ekonomıkalyq qaıtarymy bar is-sharalarǵa qaıta baǵdarlaýdy josparlap otyr.

«Memlekettik organdarmen birlesip ekonomıkalyq jáne áleýmettik tıimdilikke basa nazar aýdara otyryp, bıýdjetti josparlaýdyń tıimdiligin arttyrý boıynsha jumys júrip jatyr», - deıdi mınıstrlikten.