IMD reıtıngi: Kásipkerler ekinshi jyl qatarynan elimizde jemqorlyqtyń azaıǵanyn rastap otyr

NUR-SULTAN. QazAqparat - Osy aıda Halyqaralyq menedjmentti damytý ınstıtýtynyń (Institute for Management Development, Shveıtsarııa) álemdik básekege qabeletti zertteý ortalyǵy «IMD-2020» jahandyq básekege qabilet reıtınginiń nátıjesin jarııalady. Bul jóninde Sybaılas jemqorlyqqa qarsy is-qımyl agenttigine silteme jasap QazAqparat habarlaıdy.

Eldiń básekege qabileti ulttyq ekonomıkanyń básekege tótep bere alatyn bıznes qalyptasatyn ortany jasaý jáne qoldaýyna baılanysty bolady.

«Qazaqstan saýalnama negizinde qalyptasatyn jáne kásipkerlerdiń jemqorlyqty qabyldaýyn kórsetetin paraqorlyq pen jemqorlyqqa qarsy is-qımyl ındıkatory boıynsha ekinshi jyl qatarynan óz ornyn jaqsartty. Bıyl baǵalaýǵa qatysqan 63 memlekettiń arasynda elimiz 29-dan 27-ge, ıaǵnı 2 orynǵa kóterilip, 10 balldyń 5,01 ballyn alyp, ortasha álemdik kórsetkishten (4,80) asty. Bul - elimizdiń osy reıtıngke qatysqan kezeńdegi eń joǵary nátıjesi (2018 jyly – 39 oryn jáne 3,43 ball, 2019 jyly – 29 oryn jáne 4,28 ball)» delingen habarlamada.

Qazaqstan bul talap boıynsha Polshadan (28 oryn), Izraılden (30), Ońtústik Koreıadan (31), Lıtvadan (32), Qytaıdan (33), Ispanııadan (39), Chehııadan (44), Reseıden (51) jáne basqa biraz elden joǵary tur.

Joǵaryda atalǵan jetistikter basqa 8 halyqaralyq reıtıng agenttiginiń málimetterimen qosa Transparensı Interneshnldiń sybaılas jemqorlyqty túısiný ındeksiniń balyn esepteý kezinde eskeriledi.

Jalpy, bıznes júrgizýdegi jemqorlyqtyń birtindep tómendeýin Búkilálemdik banktiń «Enterprise Survey», Qazaqstandaǵy Transparensı Interneshnldiń «Sybaılas jemqorlyqtyń jaı-kúıine monıtorıngi», PRS «Eldik táýekelderdi baǵalaýyn» jáne basqa agenttikter júrgizgen zertteý nátıjesi de aıǵaqtaıdy.

Osy turǵydan alǵanda Covid-19 pandemııasynyń áserinen álemde oryn alǵan qıyn jaǵdaıǵa qaramastan, ınvestıtsııalyq belsendiliktiń jandanyp jatqanyn atap ótken jón.

«Sybaılas jemqorlyqqa qarsy is-qımyl agenttigi men «Atameken» UKP óz tarapynan otandyq jáne sheteldik ınvestorlardyń jalpy somasy 12 trln teńgeden astam 475 jobasyn súıemeldeı otyryp, kásipkerlerdi sybaılas jemqorlyq kórinisteri men ákimshilik bıýrokratııadan qorǵaýdy jalǵastyrýda. Jyl basynan beri Antıkor qylmystyq-quqyqtyq sharalar aıasynda laýazymdy tulǵalardyń bıznes júrgizýge zańsyz aralasýynyń 80-nen astam faktisin anyqtap, 200-ge jýyq kásipkerdiń quqyǵyn qalpyna keltirdi» dep málim etti agenttik.