Imantaý-Shalqar kýrort aımaǵynda týrızm birneshe baǵytta damytylady

PETROPAVL. QazAqparat – Soltústik Qazaqstan oblysyndaǵy Imantaý kýrorttyq aımaǵynyń halyq arasyndaǵy tanymaldyǵy jyldan jylǵa artyp keledi. Alaıda bul aımaqta áli kúnge sheshilmegen másele jetkilikti, dep habarlaıdy QazAqparat tilshisi.

Imantaý kýrort aımaǵy SQO Aıyrtaý aýdanynda ornalasqan.

Óńirdiń injý-marjany sanalatyn demalys orny tabıǵatynyń ádemiligi boıynsha Býrabaıǵa des bermeıdi. Qaraǵaıly-qaıyńdy ný ormany bar, balyqqa toly aıdyn shalqar kóldiń janynda anadaıdan menmundalaǵan taý tur.

SQO kásipkerler palatasy baspasóz qyzmetiniń málimetinshe, jaqynda Imantaýda shaǵyn jáne orta bıznesti damytý aýmaqtyq baǵdarlamalaryn ázirleý aıasynda jumys toby bolyp, týrıstik aımaqtyń áleýetimen tanysty.

«Imantaý kóli Kókshetaýdan 90 km, Nur-Sultan qalasynan 400 km qashyqtyqta ornalasqan. Shalqar-Imantaý kýrort aımaǵy týrızm salasyn damytý memlekettik baǵdarlamasynyń áleýeti joǵary TOP-10-dyǵyna kiredi. Imantaý týrısterdiń qyzyǵýshylyǵyn týdyryp, jyldan-jylǵa kelýshiler sany artyp keledi. Ákimdiktiń málimetinshe, tek byltyr munda 60 myń adam demalyp ketken. Bul Zerendi aımaǵyna kelýshilerge qaraǵanda kóp. Biraq munda áli sheshilmegen máseleler barshylyq. Sonyń biri – jol. Qazir ol jóndele bastady. Biraq keı jerler qıyrshyq tas tóselgen kúıi jatyr. Ekinshisi – kadr jetispeýshiligi. Munda týrızm boıynsha menedjerlerge, aspaz, daıashylarǵa jáne qyzmet kórsetetin basqa da sala mamandaryna suranys joǵary», - deıdi agro-aýyl týrızm qaýymdastyǵynyń ókili, qonaq úılerdiń basqarýshysy Ilnar Galıamshın.

Kásipkerlerdiń aıtýynsha, Shalqar-Imantaý kýrorttyq aımaǵynyń áleýeti joǵary. Munda eko, agro-aýyl, balyq aýlaý, sporttyq jáne týrızmniń basqa da túrlerin damytýǵa bolady.

«SQO-da jaz kóp bolsa eki aı ǵana, al qys shamamen 6 aıǵa sozylady. Sondyqtan óńirde qysqy týrızmge basymdyq bergen durys. Týrıster bizge qysta balyq aýlaýǵa, shańǵy jáne konkı tebýge nemese qystaǵy ásem tabıǵatta demalyp, monshaǵa jáne kóldegi oıyqqa shomylýǵa kelýi kerek. Bul maqsatta jumys istep jatyrmyz. Qazirgi ýaqytta Imantaýda da, Shalqarda da qysta týrısterdi qabyldaýǵa daıyn qonaq úıler bar», - deıdi Ilnar Galıamshın.

SQO jelkendi qaıyq sporty federatsııasynyń basshysy Janat Omarovtyń aıtýynsha, Imantaýda ıahta klýby ashylǵan.

Bul jerde jas týrıster aptalyq kýrstan ótip, jelkendi qaıyq sportymen aınalysa alady.

«Bizde qazir 7 jelkendi qaıyq bar. Bul jerde balalardy qaıyqpen júzýge 7 jastan bastap úırete alamyz. Imantaýda sporttyń bul túrin damytýǵa jaǵdaı bar. Únemi jel soǵyp turady. Al jergilikti balalar sýdan múldem qoryqpaıdy. Mektepterde jelkendi qaıyq sporty sektsııasyn ashyp, túrli jarystar ótkizýge bolar edi. Sporttyń bul túrin buqaralyq etip, Imantaýdyń ózindik ereksheligine aınaldyrýǵa bolady. Jospar kóp, biraq ony iske asyrýǵa óz kúshimiz jetkiliksiz, memlekettiń qoldaýy qajet», - deıdi Janat Omarov.

Qazir Aıyrtaý aýdanynda týrızmniń 44 nysany bar. Onyń 17-si Imantaý kóliniń jaǵalaýynda ornalasqan.

Buǵan deıin Imantaý aýyly turǵyndary gúl bıznesin damytyp, petýnııa ósiretin jylyjaılardyń 150-den asqanyn aıtqan edik.