Imanǵalı Tasmaǵambetovtiń qatysýymen UQShU-nyń bıylǵy alǵashqy otyrysy ótti
UQShU baspasóz hatshysy Vladımır Zaınetdınovtyń aıtýynsha, UQShU Ujymdyq qaýipsizdik keńesiniń sheshimimen Uıymnyń Bas hatshysy qyzmetine taǵaıyndalǵan Imanǵalı Tasmaǵambetovti Qaýipsizdik keńesteri hatshylary komıtetiniń (QQKK) tóraǵasy, Belarýs Respýblıkasy Qaýipsizdik Keńesiniń memlekettik hatshysy Aleksandr Volfovıch tanystyrdy.
«Osy joǵary laýazymǵa Imanǵalı Nurǵalıuly Tasmaǵambetovtiń kandıdatýrasyn Qazaqstan basshylyǵy usyndy jáne UQShU Ujymdyq qaýipsizdik keńesiniń 2022 jylǵy 23 qarashadaǵy sheshimimen maquldandy. Ol 2025 jyldyń 31 jeltoqsanyna deıin úsh jyl qyzmet etedi», - dedi Qaýipsizdik Keńesiniń memlekettik hatshysy Aleksandr Volfovıch.
Ol I.Tasmaǵambetovtiń ár jyldary Qazaqstan Respýblıkasynda túrli memlekettik qyzmetter atqarǵanyn atap ótti.
Turaqty keńes músheleri men Bas hatshylardyń orynbasarlary, Birikken shtab bastyǵy jáne UQShU hatshylyǵynyń qurylymdyq bólimsheleriniń basshylary aldynda sóılegen sózinde I.Tasmaǵambetov óziniń UQShU Bas hatshysy qyzmetine taǵaıyndalýy – ol úshin úlken mártebe jáne úlken jaýapkershilik ekenin aıtty.
«UQShU-ǵa múshe memleketterdiń basshylaryna Uıymnyń jumys qurylymyn basqarýǵa senim bildirgeni úshin alǵysymdy bildirgim keledi. Álem úlken geosaıası synaqtardyń kýási bolyp otyr, óte kúrdeli saıası, ekonomıkalyq jáne basqa da problemalardy sheshýge týra keledi. UQShU aldynda odan kem emes kúrdeli mindetter tur. Osy syn-qaterler men problemalardyń barlyǵy bizdiń Uıymnyń sheshýshi róline, onyń bedeli men aımaqtyq qaýipsizdikti qamtamasyz etýdiń tıimdi tetigi bolý qabiletine áser etedi», - dedi jańa bas hatshy.
Buǵan deıin habarlanǵandaı Imanǵalı Tasmaǵambetov Ujymdyq qaýipsizdik týraly shart uıymynyń bas hatshysy laýazymyna taǵaıyndaldy.
Avtor: Narymbek Ysmaǵulov
Foto:odkb-csto.org