IMAN BATYR DÝLATULY

Iman Dýlatuly (1780-1847) - halyq batyry, Reseı ımperııasynyń otarshyl saıasatyna qarsy ult-azattyq kóterilisiniń basshylarynyń biri, Kenesary Qasymulynyń senimdi serigi, Amangeldi Imanovtyń atasy.

Qazirgi Qostanaı oblysy Amangeldi aýdanynda (burynǵy Torǵaı ýezinde) dúnıege kelgen. Orta júz Qypshaq taıpasynyń Uzyn tarmaǵynan taraıtyn Kedel rýynyń Begimbet atasynan taraıdy. Arǵy atasy Qaqaı, óz ákesi Dýlat jońǵar shapqynshylyǵyna qarsy kúreste erlik kórsetken batyrlar bolǵan. Torǵaı, Jylanshyq ózenderiniń ańǵaryn jaılaǵan. Qazaq halqynyń sońǵy hany Kenesary Qasymovtyń Reseıdiń otarlaý saıasatyna qarsy on jylǵa sozylǵan qarýly kóterilisine Ahmet sultan Jantórın 1838 jyly óz aýylyn shapqannan keıin kelip qosylǵan. Ol Kenesary jasaǵynyń beldi uıtqysy, áskerbasylarynyń biri bolǵan. Iman batyrdyń aqyl-parasatyn, adaldyǵy men ádildigin, ótkirligi men tabandylyǵyn joǵary baǵalaǵan Kenesary Qasymuly ony Aǵybaı batyr, Shoqpar sheshen, Saıdaq qoja, inisi Naýryzbaımen birge han keńesiniń múshesi etken. Imanynyn jasaq aldyndaǵy bedelin qurmettep esimin atamaı, «Aıeke, Kósem kók, Bozjorǵa» dep ataǵan. Osy ataqtaryna saı Iman batyr da hanǵa bergen sertine adal, dushpanyna qatal bola bilgen, qashan da han jasaǵynyń yntymaǵy men birligin saqtaýǵa kúsh salǵan. Iman batyr kóterilisshilerdiń Aqmola prıkazyna, Kókalajar qamalyna, Aıdarly, Baıtoq qonystaryna shabýyldary, Ulytaý, Torǵaı, Yrǵyz dalalaryndaǵy urystary kezinde erekshe erlik kórsetken. 1847 jyly birqatar qazaq batyrlary attarynyń basyn keri burǵanda bergen antynan taımaı, hanmen birge qyrǵyz manaby Ormanǵa qarsy Kekilik taýynyń shyǵys betkeıindegi shaıqasta, qazirgi Toqmaq qalasynyń mańyndaǵy Maıtóbe degen jerde qolǵa túsip, qaza tapqan. Osy soǵysta Iman batyrmen birge onyń týǵan baýyrlary Taýyq, Keıki, Qaraýyl jáne úlken uly Berdáli de mert bolǵan.

2000 jyly qyrkúıekte Qostanaı oblysynnyń Amangeldi aýdanynyń ortalyǵynda Iman batyrǵa eskertkish ornatylǵan.

Derek kózi:

Qazaqstan ulttyq entsıklopedııasy 4 tom