Ilon Masktyń kompanııasy adam mıyna mıkrochıp ornatýǵa ruqsat aldy
Neuralink óziniń mıkrochıpteri arqyly mıdy kompıýtermen baılanystyryp, sal bolyp qalǵan adamdardyń qozǵalysyn jáne kózi kórmeıtinderdiń janaryn qalpyna keltirýge nıetti.
Kompanııa óz málimdemesinde synaqtarǵa qatysýshylardy jınaýdy áli josparlamaǵanyn atap ótti. Neuralink kompanııasynyń ruqsat alýǵa arnalǵan aldyńǵy ótinimi qaýipsizdik sebepterine baılanysty qabyldanbaǵan.
Maımyldarda synalǵan chıp mıdan taraıtyn sıgnaldardy túsindirýge jáne aqparatty Bluetooth arqyly qurylǵylarǵa jiberýge arnalǵan.
Óziniń Twitter-degi resmı akkaýntynda Neuralink «bizdiń tehnologııamyz bir kúni kóptegen adamǵa kómektesýge múmkindik beretin mańyzdy alǵashqy qadam» týraly habarlady.
«Bul – Neuralink komandasynyń atalǵan basqarmamen tyǵyz yntymaqtastyqtaǵy keremet jumysynyń nátıjesi», - delingen kompanııa málimdemesinde.
Kompanııanyń veb-saıty «qaýipsizdik, qoljetimdilik jáne senimdilik» basty basymdyqtar bolatynyna sendiredi.
2016 jyly Mask negizin qalaǵan kompanııa josparlaryn birneshe ret ózgertti. Onyń bastapqy maqsaty 2020 jyly adam mıyna chıpterdi engizýdi bastaý boldy. Keıinirek kompanııa 2022 jyly jumysqa kirisýge ýáde berdi. Ótken jeltoqsanda kompanııa janýarlar quqyǵyn buzý týraly tergeý bastalǵannan keıin taǵy bir sátsizdikke ushyrady.
Neuralink-tiń AQSh bıliginen alynǵan adamǵa eksperıment júrgizýdi maquldaý týraly habarlandyrýy shveıtsarııalyq zertteýshilerdiń mı ımplanttaryn qoldanýdaǵy osyndaı serpilis týraly sońǵy jańalyqtarynan keıin paıda boldy. Aıta ketsek, sal aýrýyna shaldyqqan nıderlandyq azamat tabany men aıaǵyna symsyz jiberilgen ımplantattar júıesiniń arqasynda, ıaǵnı tek oılaý arqyly júrip-tura aldy.