Ilon Masktyń anasy Almatynyń sulýlyǵyna tánti boldy

<p>ALMATY. KAZINFORM &ndash; Ilon Masktiń anasy Meı Mask Almatyda ótken Ortalyq Azııa áıelderiniń forýmynda Qazaqstannan alǵan áseri týraly aıtyp, tusaýkeser dástúrine tánti boldy.</p>

Amerıkalyq kásipker jáne Tesla kompanııasynyń negizin qalaýshy Ilon Masktiń anasy Meı Maskti Ortalyq Azııa áıelderiniń forýmyna qatysýshylar zor qoshemetpen qarsy aldy.

Kanadalyq-ońtústik afrıkalyq model,úsh balanyń anasy Meı Mask Qazaqstanǵa kelgenine óte qýanyshty ekenin jetkizdi.

«Men shytyrman oqıǵalardy jaqsy kóremin, saıahat jasaǵandy unatamyn. Álemniń birtalaı elinde boldym. Biraq, Qazaqstanǵa alǵash ret kelip otyrmyn. Osynda kelgenime óte qýanyshtymyn. Men Qazaqstan jáne Almaty týraly kóbirek bilgim keldi, keshe ásem qalada shaǵyn ekskýrsııa jasadyq. Bári keremet»,- dedi ol.

Sonymen qatar, meıman qazaqtyń keremet salt-dástúri týraly aıtty.

«Keshe men kishkentaı qyzdyń tusaýyn kestim. Keremet dástúr eken. Maǵan mynandaı ulttyq naqyshtaǵy saqına syılady. Kesheli beri tastamaı taǵyp júrmin», - dedi ol.

Budan bólek, Meı Mask almatylyqtarǵa densaýlyq, durys tamaqtaný, qartaıý, genderlik teńdik, balalardy jalǵyz tárbıeleý, qıyndyqtardy jeńý boıynsha tájirbıesimen bólisti.

Meı Mask - eki ǵylym magıstri dárejesi bar taǵamtaný ǵylymdarynyń doktory. Ol 45 jyldan astam ýaqyt boıy jeke tamaqtaný bıznesin júrgizedi.