Ilon Mask X jelisin satyp alǵan baǵasynan 55% tómen baǵalady

<p>Ilon Mask buryn Twitter atalyp kelgen X kompanııasynyń qunyn 19 mlrd dollarǵa baǵalady. Bir jyl buryn mıllıarder ony 44 mlrd dollarǵa satyp alǵan edi.&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;bul týraly kompanııanyń ishki qujattaryn zerdep shyqqan&nbsp;<a href="https://www.theverge.com/2023/10/30/23938969/x-twitter-valuation-19-billion-employee-shares" target="_blank" rel="noopener">The Verge</a>&nbsp;basylymyna silteme jasap habarlaıdy.</p>

30 qazanda X qyzmetkerleri kompanııadaǵy úlesin – bir aktsııasy úshin 45 dollardan alǵan. Bul kompanııanyń quny 19 mlrd dollar degendi bildiredi. Qujattarda «aktsııalardyń ádil naryqtyq qunyn X kompanııasynyń dırektorlar keńesi anyqtaıdy» delingen. Mask bul keńestiń ózin áli tolyq qalyptastyrmaǵan.

X aktsııalaryna ıelik etýshi iri ınvestorlardyń biri Fidelity qarjy holdınginiń málimetinshe, kompanııanyń naqty quny Mask Twitter-di satyp alǵan bastapqy baǵadan 65% tómen.

Pew Research Center analıtıka agenttiginiń baǵalaýynsha, Twitter-diń AQSh-taǵy eń belsendi qoldanýshylarynyń 25 paıyzy platformany azyraq paıdalanyp, tvıtti sırek jaza bastaǵan.

Guideline analıtıka fırmasynyń zertteýinshe, AQSh-ta X jelisindegi aı saıynǵy jarnamadan túsetin tabys jyldyq mánde keminde 55% tómendedi.

Eske salaıyq, Ilon Mask Twitter áleýmettik jelisin byltyrǵy qazan aıynda 44 mıllıard dollarǵa satyp alǵan bolatyn.

Keıin Mask jeli qoldanýshylaryna jańa talaptar engize bastady. Máselen, Twitter jazbalaryn oqýǵa jańa ýaqyt shekteýi engizildi. Tekserýden ótken paıdalanýshylar – kúnine 10 myń, tekserilmegen akkaýnttar – 1 myń, tekserilmegen jańa akkaýnttar – 500 tvıtti ǵana qaraı alady.

Sondaı-aq Twitter-diń qus túrindegi logotıpin H etip ózgertti.

Bıylǵy qyrkúıek aıynda mıllıarder X áleýmettik jelisin barlyq paıdalanýshy úshin aqyly etýdi kózdep otyrǵany týraly aqparat tarady.