Ilon Mask Trampty qoldaý úshin 200 mıllıon dollar jumsaǵan

<p>ASTANA. KAZINFORM &ndash; SpaceX negizin qalaýshy Ilon Masktyń &ldquo;America PAC&rdquo; saıası komıteti respýblıkashyl kandıdat Donald Tramptyń prezıdenttik naýqanyna qoldaý kórsetý úshin shamamen 200 mıllıon dollar jumsaǵan. Bul týraly &laquo;<a href="https://apnews.com/article/elon-musk-america-pac-trump-d248547966bf9c6daf6f5d332bc4be66" target="_blank" rel="noopener">Associated Press</a>&raquo; aqparat kózderine súıene otyryp habarlady.</p>

Málimetterge sáıkes, Masktyń komıteti Trampty qoldaý úshin 200 mıllıon dollar jumsaǵan, bul mıllıarderlerdiń AQSh saılaýyna áser etý qabiletiniń jańa kórsetkishin belgiledi. Tesla jáne SpaceX bas dırektory bólgen qarjy negizinen daýys berý kórsetkishi tómen bolǵan aımaqtar men birinshi ret daýys beretin saılaýshylardy tartýǵa baǵyttalǵan.

Tramp prezıdenttik básekede Masktyń qoldaýyn joǵary baǵalady.

Basylymnyń jazýynsha, Mask óziniń X áleýmettik jelisinde AQSh-tyń saıası máselelerine únemi túsinikteme berip, jyldar boıy saıası belsendilik tanytyp keledi.

Atap aıtqanda, ol eki partııany da qoldamaıtynyn aıtyp, demokrattar men respýblıkashyldardy ashyq synaǵan. 

Alaıda, ýaqyt óte kele onyń kózqarasy kóbirek respýblıkashyldarǵa qaraı aýa bastady jáne osy jyly Ilon Mask Trampty qoldaý úshin «America PAC» saıası komıtetin qurdy.

Qosa keteıik, buǵan deıin Donald Tramp pen Ilon Mask áleýmettik jelini qalaı paıdalanyp jatqany týraly jazǵan edik.