Іlııas Jansúgirovtiń tólqujatynyń túpnusqasy mýzeıge tapsyryldy

TALDYQORǴAN. QazAqparat  - Almaty oblystyq ІІD qyzmetkerleri Іlııas Jansúgirov týraly qundy qujattardy aqynnyń Taldyqorǵandaǵy ádebı-memorıaldyq mýzeıine tabystady, dep habarlaıdy QazAqparat tilshisi.

Qazaq eliniń zııalysy, aqyn Іlııas Jansúgirov qazaq ádebıetiniń damýyna eleýli úles qosqan tulǵalardyń biri. Ótken ǵasyrdyń 30-shy jyldarynda halyq jaýy dep qýdalanǵan qalamger 1937 jyly tutqyndaldy. Al 1938 jyldyń aqpanynda ol atý jazasyna kesilgen bolatyn.

Mýzeıge berilgen zattardyń arasynda eń qundysy retinde Іlııas Jansúgirovtiń pasportynyń túpnusqasyn atap ótýge bolady. Tólqujat oǵan 1936 jyly Almaty qalasynda berilipti. Munan bólek, aqyndy qamaýǵa alǵan kezde aldynan jáne qyrynan túsirilgen sýretter de bar.

Almaty oblystyq ІІD aqparatttyq-saraptama ortalyǵy basshysynyń orynbasary, polıtsııa polkovnıgi Janar Turǵanbekovanyń aıtýynsha, aqyn shyǵarmashylyǵy - tarıh. Al onyń atymen baılanysty zattar ótkennen syr shertetin mol mura. Sondyqtan bul mura tıisti orynda saqtalýy kerek.

Anyqtalǵandaı, QR Ulttyq qaýipsizdik komıteti birneshe jyl buryn repressııaǵa ushyraǵan azamattardyń kóp qujattaryn polıtsııa quzyryna tapsyrǵan. Olardyń ishinde Alash zııalylary týraly syr shertetin qundy qujattar bar.