Іle-Balqash rezervatynda órtpen kúres jalǵasyp jatyr

QONAEV. QazAqparat – Іle-Balqash memlekettik tabıǵı rezervaty aýmaǵynda tutanǵan dala órtimen kúres jalǵasyp jatyr, dep habarlaıdy QazAqparat Tótenshe jaǵdaılar mınıstrligine silteme jasap.

«Órt sóndirýshiler men jergilikti atqarýshy organdardyń birlesken kúshimen Іle-Balqash rezervaty aýmaǵynda oryn alǵan (kishigirim araldarda jáne kirme joldary joq jetýi qıyn batpaqty jerlerde) órttiń taralý aýmaǵyn 100 gektarǵa deıin azaıtýǵa múmkin boldy.

Tótenshe jaǵdaılar departamenti jáne «Іle-Balqash» memlekettik tabıǵı rezervaty» RMM kúshteri jaıaý júre otyryp, 5-kvartalda órtpen kúresýde. Qol shants quraldary men motopompalar paıdalanylýda.

Sondaı-aq Baqanas orman sharýashylyǵy ýchaskelerinde jalynnyń ótýin boldyrmaý úshin orman sharýashylyǵy kúshterimen jer jyrtý júrgizilip jatyr.

Eldi mekenderge qaýip joq», - delingen aqparatta.

Aıta keteıik, tabıǵı órtti sóndirýdi jedeldetý úshin 28 maýsym, saǵat 13.40-tan bastap «Qazavıaqutqarý» AQ-nyń MI-872 tikushaǵy jumyldyryldy. Qazirgi ýaqytta 7 ret sý shashyldy, barlyǵy 21 tonna sý.

Tilsiz jaýmen kúresti TJD jáne «Іle-Balqash» tabıǵı rezervatynyń 70-ke jýyq qyzmetkeri 34 tehnıkany qoldana otyryp jalǵastyryp jatyr.

Eske salaıyq, Іle-Balqash rezervatynda órt birneshe kún buryn bastalǵan bolatyn. 25 maýsymdaǵy jaǵdaı boıynsha, órttiń jalpy aýmaǵy shamamen 6 200 gektardy qurady, onyń 6050 gektary sóndirilgen edi.