«Іle-Balqash» rezervatyna buqar buǵylary jiberildi

NUR-SULTAN. QazAqparat – Memlekettik tabıǵı rezervatqa tórtinshi ret buqar buǵylary jiberildi. Bul joly Qarasheńgel ańshylyq sharýashylyǵynan «Іle-Balqashqa» 61 buǵy ákelindi, dep habarlaıdy QazAqparat.

«Buqar buǵysynyń Ońtústik Balqash mańyna oralýy – jolbarysty jersindirý baǵdarlamasynyń mańyzy kezeńi. Osydan 4 jyl buryn rezervat aýmaǵyna 5 buǵy jiberilgen bolatyn. Búginde olardyń sany 150-ge jetti», - deıdi QR Ekologııa, geologııa jáne tabıǵı resýrstar vıtse-mınıstri Álııa Shalabekova.

Buqar buǵylarynyń Balqash aýdanyna oralýy, jolbarysty Qazaqstanǵa jersindirý baǵdarlamasy aıasynda iske asyrylyp jatyr. Bul jobany mınıstrliktiń Orman sharýashylyǵy jáne janýarlar dúnıesi komıteti Dúnıejizilik jabaıy tabıǵat qorymen (WWF) birlesip, BUUDB qoldaýymen júzege asyryp keledi.

«Іle-Balqash» tabıǵı rezervatyna buǵylar jiberý jyl saıynǵy dástúrge aınaldy. Bul osymen tórtinshi ret júzege asyrylyp jatsa da, biz Ońtústik Balqash óńiri úshin ǵana emes, búkil Qazaqstannyń jabaıy tabıǵaty úshin de biregeı oqıǵany asyǵa kútemiz», - dedi Dúnıejizilik jabaıy tabıǵat qory (WWF) Ortalyq Azııa baǵdarlamalar dırektory Grıgorıı Mazmanıants.

Janýarlardyń erkindiktegi qozǵalysyn baqylaý maqsatynda, olardyń jiberilgen aýmaǵyna 6 fototuzaq ornatyldy. Sondaı-aq, úsh buǵyǵa GPS ornatylǵan qarǵybaý taǵyldy. Bul qurylǵynyń janýarlarǵa esh zııany joq.

Aıa ketsek, buqar buǵysy Almaty oblysy Balqash aýdanynda kóp bolǵan. Alaıda, HH ǵasyrdyń basynda joıylyp ketti. Qazaqstannyń ǵana emes, halyqaralyq Qyzyl kitapqa da engizildi. BUU Konventsııasy aıasynda qorǵalady. Búginde onyń álemdegi popýlıatsııasy 4 myńnan asady.