Іle-Balqash rezervatyna alǵashqy jolbarystardy qashan ákeledi
QazaqGeography basqarýshy keńesiniń tóraǵasy Qanat Baıǵarınniń aıtýynsha, alǵashqy jolbarystardy úsh-tórt jyldan keıin alyp kelýi ábden múmkin. «Negizi, Reseıdiń Amýr jolbarysy bizdiń klımatymyzǵa da, Turan jolbarysynyń tuqymyna da jaqyn keledi. Sol sebepti jolbarystyń dál osy túrin Qazaqstanǵa alyp kelý máselesi uıǵaryldy. Reseı jaǵy qazir-aq berýge daıyn. Biraq ol úshin rezervattyń terrıtorııasyn ǵana emes, sol jolbarystarǵa qorek bolatyn ortany da daıyndap qoıýymyz qajet. Shamamen, 2021 jyly Qazaqstanǵa alǵashqy jolbarystardy ákeledi», - dedi Q.Baıǵarın QazAqparat tilshisine berge suxbatynda.
Ǵalymnyń aıtýynsha, aldymen Іle-Balqash rezervatynyń terrıtorııasy tolyǵymen qorshalady. Qoryqshylar beketteri ornatylady. Odan keıin qaban, maral sııaqty janýarlardy kóptep ákelý kerek. «Osylaısha, aldymen jolbarystarǵa qajetti qorek bazasy jasalady. Soǵan qaraı jolbarystardyń popýlıatsııasy da retteledi», - dep atap kórsetti Q.Baıǵarın.
Aıta keteıik, bıyldan bastap Qazaqstan Úkimeti Turan jolbarysyn qazaq jerine qaıtarýǵa qatysty sharalaryn qarjylandyrýǵa kiristi. «Bastapqyda rezervattyń terrıtorııasyn zertteý jumystary júrgizildi. Oǵan qoǵamdyq uıymdardyń qyrýar qarajaty jumsaldy. Qazaqstannyń geografııalyq qoǵamy da atsalysty. Biz rezervat terrıtorııasyn xalyqaralyq saraptaý sharalaryna qoldaý jasadyq. Árıne, basty mindet - memleketti tartý. Sebebi memleket bolmasa, atalǵan bastamany iske asyrý múmkin emes. Bilýimshe, bıyl respýblıkalyq bıýdjetten 120 mln teńge bólindi. Ol aqsha rezervat terrıtorııasyn jasaqtaýǵa jumsalady», - deıdi Q.Baıǵarın.
Foto: greatcats.ru/