Іle Alataýy ulttyq tabıǵı parki qaýipsizdikti qalaı qamtamasyz etedi

ALMATY. QazAqparat - Almaty qoǵamdyq keńesiniń músheleri men mınıstrler Іle Alataýy tabıǵı ulttyq parkinde týrısterdiń qaýipsizdigin qamtamasyz etý máselesin talqylady, dep habarlaıdy QazAqparat tilshisi.

Búgin Іle-Alataýy tabıǵı ulttyq parkindegi 35 gektar jerdi jalǵa alǵan «Kýltaý ı K» JShS dırektory Aleksandr Gýjavınniń qatysýymen qoǵamdyq keńestiń onlaın otyrysy ótti.

Aıta keteıik, Aleksandr Gýjavın jalpy kólemi 35 ga bolatyn Úlken Almaty, Kishi Almaty, Kamen, Talǵar, Kókbastaý, Túrgen orman sharýashylyǵy aýmaǵyn paıdalanýǵa alǵan. Tenderlik komıssııanyń sheshimimen №1 lot jeńimpazy bolyp «KÝLTAÝ ı K» JShS tanylǵan bolatyn.

Jeke ınvestor barlyq qatysýshylardy jańa jobamen tanystyrdy. Onyń aıtýynsha, joba tabıǵatty qorǵaýǵa, qoljetimdilikti, jaılylyq pen qaýipsizdikti qamtamasyz etýge kómektesedi.

«2019 jylǵa jasalǵan taldaýǵa nazar aýdarsaq, týrıster taýda eki kún saıyn adasyp ketetin. ıAǵnı bir jylda 180 adam. Meniń oıymsha, bul - taý úshin óte kóp», - deıdi Aleksandr Gýjavın.

Sonymen qatar ol volonterler tarapynan usynylǵan erekshe ıdeıany atap ótti.

«Bizde bir qyzyq jaǵdaı boldy. Sıvers alma aǵashyn otyrǵyzǵan kúni alty aı buryn taýda joǵalyp ketken qyz tabyldy. Ol taýǵa jalǵyz ketken eken. Sodan keıin Ásel atty volonter qarapaıym bastama jasady. Mundaǵy árbir ortalyqta jýrnal bolýy kerek.Taýǵa baratyn týrısterdiń barlyǵy osy jýrnalǵa tirkelýi tıis. Onda adamdar qaı baǵytta kimmen bara jatqany týraly tolyq aqparat qaldyrady. Bul - respýblıkalyq jedel- qutqarý jasaǵy úshin úlken kómek bolmaq»,– dedi ol.

Óz kezeginde QR Ekologııa, geologııa jáne tabıǵı resýrstar vıtse-mınıstri Erlan Nysanbaev qaýipsizdik máselesinde shet elderdiń tájirıbesi de zerttelgenin aıtty.

«Biz munyń barlyǵy shetelde qalaı uıymdastyrylǵanyn kórdik. Negizgi shart - jaqsy oılastyrylǵan baǵyttardy qurý nemese uıymdastyrý. Biz Amerıkadaǵy birneshe ulttyq parkte boldyq. Siz jaı ǵana kez kelgen jerde júre almaısyz. Oǵan ruqsat joq. Barlyq týrıstik baǵyttar qaýipsizdik erejelerimen qamtamasyz etilgen. Týrısterdiń óz betinshe qalaǵan jaǵyna ketýine jol bermeý úshin zańmen retteý kerek shyǵar. Bul - qaýipsizdikti qamtamasyz etýdiń basty sharttarynyń biri», - dep tolyqtyrdy E. Nysanbaev.

Buǵan deıin, QR Ekologııa, geologııa jáne tabıǵı resýrstar mınıstrliginiń ókilderi jýrnalısterge parkti damytýdyń sheberlik josparyn tanystyrǵan bolatyn.

Eske salaıyq, Іle Alataýy tabıǵı ulttyq parkiniń biraz aýmaǵy 49 jylǵa jekemenshikke paıdalanýǵa berildi.