Іle-Alataý ulttyq parkinde balalardyń taý-shańǵy bazasyn qurý usynyldy

ALMATY. QazAqparat - Almatyda Іle-Alataý memlekettik ulttyq tabıǵı parki Qoǵamdyq keńesiniń kezekti otyrysynda park aýmaǵynda ekotýrızmdi damytý máseleleri talqylandy. Máselen, balalarǵa arnalǵan taý shańǵysy sportyn damytý bazasyn daıyndaý týraly usynys aıtyldy, dep habarlaıdy QazAqparat tilshisi.

QR Ekologııa, geologııa jáne tabıǵı resýrstar mınıstrliginiń baspasóz qyzmetinen málim etkendeı, 2021 jyly aqpan aıynda Іle-Alataý ulttyq parkinde ekologııalyq týrızm ınfraqurylymyn damytýdyń bas josparyn qaraý boıynsha qoǵamdyq tyńdaý ótti. Qoǵamdyq tyńdaý hattamasy Іle-Alataý ulttyq parki men Almaty qalasy jáne Almaty oblysy Týrızm basqarmalarynyń saıttarynda jarııalandy. Ulttyq parkterde týrıstik jáne rekreatsııalyq qyzmetti júzege asyrý erejesine sáıkes tenderlik jáne konkýrstyq qujattar jobasy da ulttyq parktiń ınternet-resýrsyna salyndy.

«Qazirgi ýaqytta Ulttyq park ekologııalyq týrızm qyzmetine jerlerdi uzaqmerzimdi paıdalanýǵa beriletin ýchaskeler sany 9-dan 8-ge, ıaǵnı 171 gektarǵa, qysqarmerzimdi paıdalanýǵa usynylatyn jerler 26-dan 11-ge, 7,9 gektarǵa azaıdy. Uzaqmerzimdi jobalarǵa qoıylatyn negizgi talap - keshendi qurylys júrgizbeı, qaıta alynatyn qadalar qaǵý nemese geoburandalar tehnologııasyn qoldaný jáne jerdiń qunarly topyraǵyna zııan keltirmeý. Sonymen qatar qaldyqtardy basqarý, tazalaý qurylǵylaryn qoldaný múmkindikterin qarastyrý kerek»,- dedi Іle-Alataý MUTP dırektory Damır Malgeldıev.

Atap óteıik, qoǵam ókilderiniń pikirin eskere kele ulttyq park jerlerin uzaqmerzimdi paıdalanýǵa berý 49 jyldan 25 jylǵa, qysqamerzimdi paıdalanýǵa berý 5 jyldan 1 jylǵa qysqardy. Qorshaǵan ortaǵa zalal keltirmeý talaptary saqtalmasa, Ulttyq park kelisimshartty birjaqty negizde buza alady.

Jıynda Almaty qalasy Týrızm basqarmasynyń basshysy Sabına Amangeldi «TsSKA» taý shańǵy bazasyn rekonstrýktsııalaý jobasyn tanystyrdy. Keńes músheleri atalǵan nysan ásirese, balalarǵa yńǵaıly belsendi demalys aımaǵy retinde damýy tıis ekendigin atap ótti. Aldaǵy ýaqytta atalǵan jerde balalar taý shańǵysy bazasyn jasaý máselesi men basqa da jobalar taǵy da keńes talqysyna salynady.

Jıyn qorytyndysy boıynsha keńes músheleri ekotýrızm jobasyn júzege asyrý josparlanǵan ýchaskelerde kóshpeli jınalys uıymdastyrý týraly sheshimge keldi.

Atap óteıik, erekshe qorǵalatyn tabıǵı aýmaqtarda ekologııalyq týrızmdi damytý azamattardyń boıynda tabıǵatqa janashyrlyqty qalyptastyrýǵa septigin tıgizetin ekologııalyq aǵartý jumysyn júrgizýge jáne jergilikti halyqty qyzmet kórsetý salasynda jumyspen qamtýǵa múmkindik beredi.

Tender men konkýrsqa qatysty aqparat, qabyldanǵan sheshimder jaıynda aqparat Alataý ulttyq parkiniń saıtynda jarııalanady.