Іlbistiń joıylyp ketý qaýpi bar - maman

ALMATY. QazAqparat - Іlbistiń joıylyp ketý qaýpi bar. Oǵan taýly aımaqtarda salynyp jatqan kýrorttar men týrıster aǵyny sebep. Mundaı pikirdi ilbisti baqylaý ortalyǵynyń terıologııa zerthanasynyń meńgerýshisi, Wildlife Without Borders múshesi Alekseı Grachev aıtty, dep habarlaıdy QazAqparat tilshisi.

Alekseı Grachevtiń sózinshpe, Almatynyń taýly óńirleri negizgi landshaftyq-ekologııalyq kórsetkishter boıynsha ilbisterdiń tirshilik etý ortasy úshin joǵary áleýetke ıe.

«Alaıda, qar barysynyń ekojúıelerine jaqyn ornalasqan qala-megapolıs, halyq sanynyń únemi ósý qarqyny jáne ınfraqurylymnyń damýy ilbistiń ómir súrýine keri áser etedi. Tipti, joıylyp ketý qaýpi bar. Oǵan taýly jerde kýrorttardyń salynýy men rettelmeıtin, stıhııalyq týrıster aǵyny sebep bolyp otyr. Almaty mańyndaǵy taý ýchaskelerin odan ári ıgerý jaǵdaıdy odan ári ýshyqtyryp, tek jabaıy janýarlardyń ǵana emes, búkil ekojúıeniń tirshilik etý ortasyna keri áserin tıgizetini anyq», - deıdi ǵalym.

Aıtýynsha, Zoologııa ınstıtýtynyń ǵalymdary júrgizgen sońǵy zertteýlerge sáıkes, Almaty tóńiregindegi keıbir ýchaskelerde 1 200 metr bıiktikten qar barystary tabylǵan.

«Bul shamamen Kóktóbe deńgeıinde. Negizinen, qar barystary qysta sonshalyqty tómen túsedi. Barystar Almatynyń qazirgi shekarasynda – Bostandyq jáne Medeý aýdandarynda turady, ıaǵnı olar qala turǵyndary retinde esepteledi. Іle Alataýynda mekendeıtin 40 barystyń 23-i Almaty qalasynan 30 shaqyrym radıýsta mekendeıdi, onyń ishinde 5 dara túri qalada turady», - dedi Alekseı Grachev.

Foto:nomawallpapers.blogspot.com