Ilıa Ilın shymkenttik ýnıversıtettiń «Qurmetti professory» atandy

ShYMKENT. QazAqparat – Aýyr atletıkadan tórt dúrkin álem chempıony Ilıa Ilın Shymkentke kelip, M.Áýezov atyndaǵy Ońtústik Qazaqstan memlekettik ýnıversıtetiniń jastarymen kezdesti. Basqosýda sport sheberi óziniń sporttyq jetistikterge jetý jolyndaǵy qajyrly is-áreketi men maqsatkerligin, jigerli umtylysy týraly áńgimelep berdi, dep habarlaıdy QazAqparat tilshisi.

Basqosýda ziltemirshi ómirde kezdesetin túrli kedergilerdi jeńe bilý, ustamdylyq pen parasattylyq týraly óziniń kókeıge túıgen oılarymen bólisti.

«Aldaǵy ýaqytta ózimdi sport menedjeri retinde synap kórsem deımin. Adam bul ómirde bárine daıyn bolýy kerek. Úırenýden jalyqpańyzdar» degen ol stýdentterdiń saýaldaryna da jaýap berdi.

Jastardy ásirese Ilıa Ilınniń sporttaǵy baǵyndyrǵan belesteri qyzyqtyrdy.

Aıta keteıik, eriktiler jylyna oraı uıymdastyrylǵan bul sharanyń maqsaty jastardy sportqa, tazalyqqa, eńbekqorlyqqa baýlý boldy. Sondaı-aq ómirde jetistigi mol tulǵalardyń ómir jolyn úlgi etip, jastardyń ómirde durys jol tańdaýyna kómektesý boldy.

Shara sońynda Ilıa Ilınge joǵary oqý ornynyń «Qurmetti professory» ataǵy berildi.

Eske salaıyq, dopıng daýynan keıin dodalarǵa qatysa bastaǵan áıgili sportshy jýyrda ǵana Ózbekstanda aýyr atletıkadan ótken halyqaralyq chempıonatta top jarǵan bolatyn.