iKOMEK astanalyq ortalyǵyna TJ rejımi kezinde 160 000-nan astam qońyraý shalyndy

NUR-SULTAN. QazAqparat - Aǵymdaǵy jyldyń 5 jáne 19 qańtary aralyǵyndaǵy tótenshe jaǵdaı rejımi kezinde iKOME qalalyq ortalyǵy 160 000-nan astam qońyraý qabyldady, dep habarlaıdy Nur-Sultan qalasy ákimdiginiń «Qalalyq monıtorıng jáne jedel áreket etý ortalyǵyna» silteme jasap.

Tótenshe jaǵdaı rejımi kezinde Nur-Sultan qalasy ákimdiginiń iKOMEK109 biryńǵaı baılanys ortalyǵyna turǵyndardan 160 000-nan astam qońyraý kelip tústi.

Qala turǵyndaryn bárinen de densaýlyq saqtaý, qoǵamdyq kóliktiń jumysy men tótenshe jaǵdaı rejıminiń sharttaryna qatysty suraqtar alańdatty.

Sonymen qatar iKOMEK qyzmetkerleri táýlik boıy beınebaqylaý kameralaryna monıtorıng jasaý arqyly elordadaǵy qaýipsizdikti qamtamasyz etti. Quqyqbuzýshylyqtardy jedel anyqtap, joıyp otyrdy.

Ortalyqtyń TJ kezindegi eń mańyzdy mindetteriniń biri qala turǵyndarymen jáne qonaqtarymen úzdiksiz baılanys ornatý boldy. Kúrdeli jaǵdaılarda qala turǵyndary men bılik arasyndaǵy jedel ári naqty kommýnıkatsııa mańyzdy ról atqarady. Al iKOMEK109 bul tusta baılanys ornatyp, tynys-tirshiliktiń tynyshtyǵy men qaýipsizdigin qamtamasyz etetin «kópir» qyzmetin atqardy.

«Árıne elde TJ jaǵdaıy alynyp tastaldy dep, biz bosańsymaımyz, ári qaraı kúsheıtilgen rejımde jumys jasaýdy jalǵastyramyz. Qazirgi tańda el aldyndaǵy úlken másele koronavırýs ınfektsııasynyń jańa shtamy – omıkron. Qazir karantınniń kúsheıtilýimen baılanysty, ekpe alý, qaıta ekpe alý týraly kóptegen qońyraýlar kelip túsýde», - dedi iKOMEK109 qalalyq ortalyǵynyń basshysy Jannat Dúbirova.

Anyqtama:

iKOMEK109-ǵa júginý joldary

1. Ákimdiktiń resmı saıty: astana.gov.kz

2. Telegram chat-boty (t.me/nursultanikomek109_bot);

3. iKOMEK109 mobıldi qosymshasy (PlayMarket/AppStore);

4. Smart Astana mobıldi qosymshasy (PlayMarket/AppStore);