IKAO men QR avıatsııalyq ákimshiligi personaldy oqytý qyzmetterin kórsetý týraly kelisim jasasty

ASTANA. QazAqparat - IKAO men Qazaqstannyń avıatsııalyq ákimshiligi arasynda personaldy oqytý qyzmetterin kórsetý týraly kelisimge qol qoıyldy, dep habarlaıdy Azamattyq avıatsııa komıtetiniń baspasóz qyzmeti.

Seýlde Halyqaralyq azamattyq avıatsııa uıymynyń (IKAO) engizýdi qoldaý jónindegi ekinshi jahandyq sımpozıýmy (GISS) ótýde, oǵan IKAO Bas hatshysy, IKAO-ǵa múshe memleketterdiń kólik mınıstrleri, avıatsııalyq bılik organdary jáne avıatsııa salasynyń basqa ókilderi qatysady
Qazaqstan tarapynan Qazaqstannyń avıatsııalyq ákimshiliginiń, «Qazaeronavıgatsııa» RMK jáne «Azamattyq avıatsııa akademııasy» AQ ókilderi qatysýda. Delegatsııany Qazaqstannyń avıatsııalyq ákimshiligi Bas dırektorynyń orynbasary Saltanat Tompıeva basqarady.Koreıa Respýblıkasynyń Jer, ınfraqurylym jáne kólik mınıstrligi uıymdastyrǵan jahandyq sımpozıým IKAO Dúnıejúzilik avıatsııalyq forýmyn (IWAF), jahandyq avıatsııalyq daıyndyq sımpozıýmyn (GACS) jáne TRAINAIR PLUS-ty IKAO-nyń eń jańa tsıfrlyq quraldaryn, avıatsııanyń turaqtylyǵyn, ınnovatsııalardy, turaqty damýdy jáne jedel sheshimderdi qoldaý boıynsha negizgi bastamalar men birlesken kúsh-jigerdi qamtý maqsatynda biriktiredi.
Forým aıasynda IKAO men Qazaqstannyń avıatsııalyq ákimshiligi arasynda personaldy oqytý qyzmetterin kórsetý týraly kelisimge qol qoıyldy. IKAO atynan qujatqa IKAO quzyrettiligin damytý jáne engizý bıýrosynyń dırektory Horhe Vargas qol qoıdy.
Sondaı-aq Birikken avıatsııalyq basqarý organdaryn oqytý uıymy (JAA TO) men Avıatsııa ákimshiligi arasynda oqytý qyzmetterin kórsetý týraly negizdemelik kelisimge qol qoıyldy.
Negizdik kelisimge Birikken avıatsııalyq bılik organdaryn oqytý uıymynyń bas dırektory Paýla Vıeıra de Almeıda men Avıatsııa ákimshiligi bas dırektorynyń orynbasary Saltanat Tompıeva qol qoıdy.
Sondaı-aq, forým alańynda azamattyq avıatsııany odan ári damytý máseleleri boıynsha IKAO jáne Federaldyq avıatsııa ákimshiligi (FAA) ókilderimen birqatar ekijaqty kezdesýler ótti.

Aıta keteıik, Jaa oqý uıymy (JAA TO) - gollandııalyq kommertsııalyq emes uıym jáne eýropalyq azamattyq avıatsııa konferentsııasynyń (ECAC) qaýymdastyrylǵan organy. JAA TO áýe kóligi sektorynda avıatsııa salasy men Ulttyq retteý organdaryn oqytýdyń 50 jyldyq tarıhyna ıe.
JAA TO – Halyqaralyq azamattyq avıatsııa uıymy (ICAO) jáne EASA vırtýaldy akademııasynyń (EVA) jetekshi múshesi retinde tanylǵan Eýropadaǵy jalǵyz sheberlik oqý ortalyǵy (TCE). Jaa to jyl saıyn qaýipsizdik, qorǵanys, drondar jáne basqarý sııaqty taqyryptar boıynsha 300-den astam oqý kýrstaryn josparlaıdy.