ІІO qaza tapqan qyzmetkerleriniń balalary kýrsant atandy

ASTANA. QazAqparat – Vedomstvolyq bakalavrıattyń artyqshylyǵy – tájirıbe men teorııalyq bilimniń qatar júrýi. Osyǵan baılanysty bıyl ІІM bastamasymen jáne Memleket basshysynyń qoldaýymen Almaty jáne Qostanaı akademııalarynda joǵary bilim berý baǵdarlamalary boıynsha oqýǵa qabyldaý qaıta bastaldy, dep habarlaıdy QazAqparat Polisia.kz saıtyna silteme jasap.

Jańa erejege sáıkes vedomstvolyq oqý oryndaryna qyzmettik mindetterin atqarý kezinde qaza tapqan nemese múgedektik alǵan qyzmetkerlerdiń balalary jáne shekti ball deńgeıin jınaǵan Ulttyq ulan qatarynda merzimdi áskerı qyzmet ótkergender, «Altyn belgi» ıegerleri jáne UBT-da keminde 100 ball jınaǵan talapkerler konkýrstan tys túse alady.

El Prezıdenti Qasym-Jomart Toqaevtyń qyzmetkerlerdi irikteý jáne daıarlaý sapasyn arttyrý jónindegi tapsyrmasyna sáıkes polıtsııa vedomstvosynyń joǵary oqý oryndary úshin bilim berý baǵdarlamalarynyń tizbesi keńeıtildi. Endi oqytý jedel-izdestirý, ákimshilik-quqyqtyq, jedel-krımınalıstıkalyq, qylmystyq-atqarý qyzmeti, sotqa deıingi tergeý, ІT-krımınalıstıkalyq qamtamasyz etý, kıberqaýipsizdik, aqparattyq júıeler men tehnologııalar, pedagogıka jáne psıhologııa sııaqty baǵyttar boıynsha júrgiziledi.

17-26 shilde aralyǵynda vedomstvolyq joǵary oqý oryndaryna túsý úshin ótinimder qabyldaý jáne konkýrstyq irikteý ótti. Іrikteýge Almaty, Qaraǵandy jáne Qostanaı akademııalaryndaǵy 800 orynǵa Qazaqstannyń túkpir-túkpirinen 1 500 talapker qatysty. Aıta ketý kerek, bıyl JOO-ǵa túsýdiń barlyq protsesi alǵash ret ata-analar men talapkerlerdiń jaqyndary úshin ashyq boldy.

«Biz bári adal ótti dep naqty aıta alamyz. Mundaıdy buryn-sońdy kórgen emespiz. Talapkerlerdi qabyldaý naýqanynyń uıymdastyrylýy men formaty óte jaqsy», – dep ata-analar óz pikirlerimen bólisti.

Konkýrstyq komıssııa quramynda sarapshylar, tanymal blogerler, azamattyq qoǵam ókilderi boldy. Olar da joǵary oqý oryndaryna kandıdattardy irikteýdiń ashyqtyǵyn atap ótip, oń baǵasyn berdi. Konkýrstan tys oqýǵa túskenderdiń arasynda 14 «Altyn belgi» ıegeri, UBT-da 100-den astam ball jınaǵan 25 talapker jáne qaza tapqan ishki ister organdary qyzmetkerleriniń úsh balasy bar.

Sonymen qatar polıtsııanyń joǵary oqý oryndarynda bilim alýǵa 49 sport sheberi men úmitker, halyqaralyq jáne respýblıkalyq olımpıadalardyń 16 júldegeri ótinim berdi. Bolashaq tártip saqshylarynyń qataryna qosylǵan qyz-jigitter endi ózderi tańdaǵan mamandyqtardyń qyr-syryn jetik meńgeretin bolady. Al joǵary oqý oryndarynyń oqytýshylar quramy óz kezeginde árbir kýrsanttyń naǵyz maman jáne Otanyna adal azamat bolýy úshin bar kúshin salady.