ІІM senim telefondary: 17 habarlama polıtsııa qyzmetkerleriniń zańsyz áreketterine qatysty boldy
Vedomstvo derekterinshe, mınıstr Erlan Turǵymbaevtyń tapsyrmasy boıynsha azamattarǵa óz quqyqtaryn qorǵaý, qaýipsizdikti qamtamasyz etý, týystaryn izdeýge baılanysty málimetter berý, sondaı-aq polıtsııa qyzmetkerlerine kómek kórsetý úshin qurylǵan ózindik qaýipsizdik bólimsheleriniń koll-ortalyqtary jáne ІІM senim telefony (14-02 nemese 71-41-09) jumysyn jalǵastyrýda. Árbir ótinish muqııat qaralyp, zańdy sheshim qabyldanady.
«Aýmaqtyq bólimsheler basshylarynyń azamattardy apta saıyn qabyldaýy jolǵa qoıylyp, front-ofısteriniń úzdiksiz jumysy qamtamasyz etildi. Bir táýlik ishinde senim telefondaryna 124 habarlama kelip tústi, onyń 107-si konsýltatıvtik-anyqtamalyq sıpatta boldy. 17 habarlama polıtsııa qyzmetkerleriniń zańsyz áreketterine, onyń ishinde qońyraý shalýshylardyń týystaryn izdeý jáne ustalý sebepterine qatysty. Quzyrettilikke sáıkes árbir jaǵdaı boıynsha túsiniktemeler berildi. Almaty, Atyraý, Semeı, Shymkent, Almaty oblysy Shelek kentiniń turǵyndary quqyq qorǵaý organdary ustaǵan týystarynyń ornalasqan jerin anyqtaý týraly ótinishpen júgindi», - dep atap ótedi mınıstrlikten.
Taratylǵan aqparatqa qaraǵanda, prokýratýra organdary ustaǵan úsh adamǵa qatysty QR QK-niń 272-baby (Jappaı tártipsizdik) boıynsha, onyń ishinde bireýi QR QK-niń 380-babymen (Qyzmetkerdiń ómirine qol suǵýshylyq) sotqa deıingi tergeý júrgizilip, olar sottyń sanktsııasymen qamaýǵa alynǵany anyqtaldy. Іzdeýdegi eki adam dúkender tonady degen kúdikke ilindi. Olarǵa qatysty QR QK 188-baby 2-bóligi (Urlyq) boıynsha is tergelýde. Ótinish berýshilerge týǵan-týysqandarynyń ornalasqan jeri habarlandy jáne tıisti túsiniktemeler berildi.
«Qyzylorda turǵyny ulynyń qazasy týraly málimet surady. 7 qańtarda belgisiz bireýler avtokólikti mas kúıinde basqaryp, tártip saqshylary men jol qozǵalysyna qatysýshylarǵa qaýip tóndirgen. Olardyń jol erejesin óreskel buzyp, jasyrynyp qashýǵa tyrysyp, zańdy talaptarǵa baǵynbaǵany anyqtaldy. Qyzmetkerler áýeli áýege eskertý oǵyn atyp, sodan keıin kóliktiń artqy dóńgelekterin atý arqyly toqtatýǵa tyrysty. Oqıǵa barysynda júrgizýshi jaraqat alyp, jolaýshy kóz jumdy. Bul iske qatysty oblys prokýratýrasy sotqa deıingi tergeýdi bastady», - dedi vedomstvodan.
Mınıstrlik málimetinshe,birqatar azamat uıaly telefondaryn tartyp alýǵa baılanysty shaǵymdandy. QR QK-niń 272-baby (Jappaı tártipsizdik) boıynsha júrgizilgen sotqa deıingi tergeý aıasynda kóptegen telefondar tárkilengeni anyqtaldy. Eki jaǵdaı boıynsha ózindik qaýipsizdik bólinisteri tekserýler júrgizedi. Óskemen qalasyndaǵy tergeý ızolıatoryndaǵy týysqanymen qysqa merzimdi kezdesýge ruqsat berilmeýine baılanysty túsken shaǵym tekserildi. Tekserý barysynda bas sanıtarlyq dárigerdiń qaýlysyna sáıkes, koronovırýstyq ınfektsııanyń taralýyna jol bermeý úshin QAJ mekemelerinde kezdesýler ýaqytsha shektelgeni anyqtaldy.
Almaty turǵyny polıtsııa qyzmetkerleri Aqsaı-3 shaǵyn aýdanyndaǵy dúken jertólesiniń esigin syndyrdy dep shaǵymdandy. Bul shaǵymdy tekserý barysynda 297-bap boıynsha sotqa deıingi tergeý sheńberinde (Esirtki quraldaryn zańsyz daıyndaý) jertóleden belgisiz hımııalyq zattar tabylyp, olar boıynsha saraptama taǵaıyndalǵany anyqtaldy. Atalǵan qylmysty jasady degen kúdikti ustaldy. Qazirgi ýaqytta onyń ústinen tergeý áreketteri júrgizilip jatyr.
ІІM senim telefony jumysy jalǵasýda, onyń nátıjeleri jurtshylyqqa únemi habarlanady.