ІІM reseılik nómirli kólikterdi tirkeý týraly: Zańda jeńildik jaǵy qarastyrylmaǵan

NUR-SULTAN. QazAqparat – Elimizdiń Іshki ister mınıstrligi reseılik nómirli kólikterdi tirkeýde eshqandaı jeńildiktiń bolmaıtynyn málimdedi, dep habarlaıdy QazAqparat tilshisi.

«Qazaqstan aýmaǵyna syrttan ákelingen kez kelgen kólik zańǵa saı tirkeýden ótýi tıis. Jáne talap barlyq azamattarǵa ortaq. ıAǵnı kólik tirkeýge qatysty zańda belgili bir sanattaǵy azamattarǵa jeńildik jaǵy qarastyrylmaǵan Sondyqtan da elimizde tirkelmegen kólik ıelerin erejege baǵynýǵa shaqyramyz. Olaı bolmaǵan jaǵdaıda zań aıasynda avtokóligi tárkilenip, ıesine aıyppul salynady», - dedi Serik Túsipov mınıstrlikte ótken baspasóz máslıhatynda.

Sondaı-aq, ІІM ókili eger Qazaqstanda tirkelmegen kóliktiń sheteldegi ıesi tabylsa ne bolatynyn aıtty.

«Jalpy tirkelmegen kólikti satyp alý nemese ekijaq ózara kelisip tirkemeý azamattyq-quqyqtyq qarym-qatynas formaty boıynsha jasalatyn kelisim. Bul oraıda biz máseleniń naqty qalaı sheshý kerektigin aıta almaımyz. Basty talap elimizge kelgen kólik zań boıynsha tirkelýi tıis. Kóliktiń tirkelmegenin nemese Qazaqstanǵa zańsyz ákelingenin bazadan anyqtaýǵa bolady. Al onyń ıesin izdeý Reseımen birlesip atqarylatyn jumys», - deıdi ol.

Onyń aıtýynsha, búginde elimizde 4 mln 200 myńnan astam avtokólik tirkelgen.

Buǵan deıin Serik Túsipov Reseıden zańsyz kólik ákelip, biraq elde tirkemegen 100-den astam qazaqstandyqqa izdeý salynǵanyn málim etken bolatyn.

Aıta ketsek, Qazaqstanda júrgen reseılik nómirli 88 myń kóliktiń tirkeýden shyǵarylǵany anyqtaldy.